Solovyovun Latviyaya girişinə "stop" qoyuldu
Latviya xarici işlər naziri Edqars Rinkeviçs, “Russia 1” kanalının teleaparıcısı Vladimir Solovyovun ölkəyə girişinə qadağa qoyub. DİASPOR.İNFO xəbər verir ki, Latviya XİN rəhbəri bunu Twitter-də yazıb.
"Rusiya Federasiyası vətəndaşı Vladimir Solovyovu Latviya Respublikasının arzuolunmaz şəxsləri siyahısına daxil etmək barədə qərar verdim", deyə Edqars Rinkeviçs bəyan edib.
Nazir, "Nasizmin təriflənməsinin" Latviya üçün qəbuledilməz olduğunu da qeyd edib.
Qeyd edək ki, skandal, Adolf Hitlerin də adının çəkildiyi Aleksey Navalnı ilə bağlı yayımdan sonra alovlanıb.
Soloviev isə cavabında bildirib ki, hadisəni vəkili ilə müzakirə edəcək.
"İndi kimə qarşı məhkəməyə müraciət edəcəyimizi və kimin məhkəməyə veriləcəyini düşünməliyik. Göründüyü kimi nazir bunu qətiyyən başa düşməyib. Üstəlik, başa düşdüyüm qədər, kanalımız orada yayımlanmır və Navalnının tərəfdarları Twitterdə mühakimə edilir", deyə Solovyov Latviya xarici işlər nazirinin qərarını şərh edib.
Xatırladaq ki, 44 günlük müharibə dövründə də Solovyov erməni terrorizmini müdafiə edirdi. Hətta, Solovyovun həqiqətin yanında yox, ədalətsizliyi dəstəklədiyinin biz özümüz də şahidi olmuşuq. Məhz bu baxımdan Latviya xarici işlər naziri Edqars Rinkeviçsin reaksiyası və Solovyova qadağa qoyması başadüşüləndir.
Müəllif: İnam Hacıyev
