Sübut Əsədov: İkinci Qarabağ müharibəsi bu gün dünyanın aparıcı ölkələrinin hərbi məktəblərində öyrənilir
“İkinci Qarabağ müharibəsi bu gün dünyanın aparıcı ölkələrinin hərbi məktəblərində öyrənilir. Ona görə ki, XXI əsrin müharibəsini aparan Azərbaycan Ordusu Ali Baş Komandan İlham Əliyevin rəhbərliyi ilə Ermənistan ordusunu məhv edib”. Bu fikirləri qəzetimizə açıqlamasında Azərbaycan Respublikaçılar Partiyasının sədri Sübut Əsədov deyib.
Partiya sədrinin sözlərinə görə, son illərdə ölkədə aparılan siyasət məhz həmin möhtəşəm qələbəyə hesablanmışdı: “Məlum olduğu kimi, son illərdə ölkəmizdə hərbi, iqtisadi və siyasi sahədə əldə edilən inkişaf Azərbaycanı düşmənin bütün hücum və təxribatlarına layiqli cavab verməyə qadir olan qüdrətli dövlətə çevirdi. Cəmiyyətin bütün təbəqələrinin milli birlik və həmrəylik nümayiş etdirməsi isə qələbəmizi təmin etdi”.
S.Əsədov onu da vurğulayıb ki, Vətən müharibəsində əldə edilən qələbəyə görə, ilk növbədə, gənclərə borcluyuq: “Son illərdə ölkədə gənc nəslin tərbiyə edilməsi istiqamətində də məqsədyönlü işlər görülüb. Son nəticədə, Azərbaycanın ərazi bütövlüyü uğrunda canını fəda edə biləcək gənc nəsil yetişib. Həmin gənc nəsil öz qanı-canı bahasına torpağımızı düşmən tapdağından azad edib. Əlbəttə, Vətən müharibəsində bütün nəsillərin nümayəndələri qəhrəmanlıq göstəriblər, amma əsas missiyanı son illərdə yetişən gənclər yerinə yetiriblər”.
Qaşqay ZİYƏDDİNOĞLU
