“Pandemiyanın ilk günündən Cənab Prezidentin göstərişi ilə respublikada pandemiyaya görə bir sıra tədbirlər planı həyata keçirildi. Yeni klinika açılması, modul tipli xəstəxananın istifadəyə verilməsi və sair buna misaldır. Yeni klinikanın sentyabrda açılmalı nəzərdə tutulmuşdu, amma qısa müddət ərzində onun istifadəyə veriməsi, qısa müddətdə modul tipli xəstəxananın istifadəyə verilməsi, regionlarda koronavirusla mübarizə mərkəzlərinin yaradılması, tibbi maska istehsalına başlanması, əhali arasında, xüsusilə də əhaliyə dəstək üçün koronavirusla mübarizədə az təminatlı insanlara müəyyən büdcənin ayrılması bəli, Cənab Prezidentimizin xalqa olan diqqəti və qayğısıdır. Hər bir vətəndaş da mandatından, vəzifəsindən asılı olamayaraq bilməlidir ki, Vətəni, xalqı qorumaq hər kəsin vəzifə borcudur”. Bu sözləri Diaspor info-ya verdiyi açıqlamasında "Sağlamlığın Qorunması" İctimai Birliyinin sədri Yazgül Abdıyeva deyib.
İctimai Birliyinin sədri qeyd edib ki, Cənab Prezidentimizin gördüyü işlər alqışa layiqdir və biz vətəndaş olaraq onun yanında olmalıyıq: “Əgər bir vətəndaş özünü və ətrafını qoruyarsa, qısa müddətdə bu xəstəliyin qarşısını almaq olar. Çox təəssüflər olsun ki, insanların çoxu başa düşmür, gizli olaraq toy mərasimləri, yas mərasimləri, ad günləri keçirir və bu xəstəliyin ağırlığını hələ də başa düşməyən insanlar var. Amma başa düşən insanlar da var və insanlar tibbi maskadan düzgün istifadə edib, gigiyena qaydalarından istifadə etsə, sosial məsafəni düzgün gözləsə, onlarda heç bir xəstəliyə rast gəlmək olmaz. Amma təəssüflər olsun ki, insanların çoxu buna əməl etmirlər. Xüsusilə də avqustda çimərliyin açılması məsələsinə diqqət yetirərkən baxaq görək, insanlar bu çimərlikdən düzgün istifadə etdimi? Nə qədər çirkləndirdilər. Yəni, bizim vətəndaşlarımız Cənab prezidentin yanında olmalıdır".
Y.Abdıyeva bildirib ki, pulsuz müalicə zamanı fərq qoyulmadı: "Hamıya eyni dərəcədə yanaşılması və dərmanların pulsuz olaraq verilməsi, həkimlərin bir qrupunun xüsusi otellərdə yerləşdirilməsi üçün dövlət hər gün büdcədən pul xərclədi. Bu, xalq üçün, əhali üçün xərcləndi. Xalq da bunu bilməli və sağlamlığını özü qorumalıdırlar. İndi artıq məktəblər də açılır və məktəblərdə də yenə maska, məsafə, gigiyena qaydalarına xüsusilə əməl olunmalıdır. Restoranlar da açılıbsa, bu o demək deyil ki, insanlar qaydalara əməl etməsinlər. Yenə də orada müəyyən məsafə gözlənilməlidir.
Hər bir vətəndaş qaydalara əməl etməlidir. Diqqət etsək görərik ki, ən çox yoluxma halları marketlərdə, apteklərdə olur. Avtobuslarda da hal-hazırda sıxlıq var. Yəqin ki, avtobusların sayını artırmaq lazımdır. Qaydalara baxmaq, ictimai nəzarəti gücləndirmək lazımdır. Cəmi 10 milyon əhalimiz var. Xalq olaraq, vətəndaş olaraq həm bir-birimizə dəstək olmalıyıq, həm də Cənab Prezidentin ətrafında sıx birləşərək dövlətimizə dəstək olmalıyıq”.