Dövlət İmtahan Mərkəzi (DİM) musiqi sənəti istiqaməti üzrə qabiliyyət imtahanlarında zal nəzarətçisi qismində iştirak etmək istəyənləri əməkdaşlığa dəvət edir.
Bu barədə Diaspor.info DİM-dən məlumat verilib. İnstrumental ifaçılıq, xalq çalğı alətləri ifaçılığı, musiqişünaslıq, bəstəkarlıq, dirijorluq, populyar musiqi və caz ifaçılığı, vokal sənəti ixtisasları üzrə ali təhsili, bu sahə üzrə iş təcrübəsi (pedaqoji və ya ifaçılıq) və sənədlərlə işləmək bacarığı olan şəxslər musiqi sənəti istiqaməti üzrə keçirilən qabiliyyət imtahanlarında zal nəzarətçisi olmaq üçün Dövlət İmtahan Mərkəzinə müraciət edə bilərlər.
Musiqi sənəti istiqaməti üzrə imtahanlar iyun-avqust aylarında şənbə və bazar günləri daxil olmaqla həftə ərzində keçirilir. İmtahanlar gün ərzində 1 və ya 2 növbəli olur. Hər növbə üçün müvafiq əməkhaqqı ödənilir.
Nəzarətçinin vəzifələri:
- Abituriyentin sənədlərini yoxlamaq;
- İmtahan zalında nizam-intizam qaydalarını qorumaq;
- Videoçəkilişin aparılması üçün lazımi avadanlıqla işləmək;
- Abituriyentə verilən imtahan nəticəsi barəsində imtahan protokolunu doldurmaq.
Müraciət etmək istəyənlər anket formasını dolduraraq [email protected] elektron poçt ünvanına göndərə bilərlər. Ətraflı məlumat üçün namizədlər (012) 3105316 (daxili 1339) nömrəsi ilə əlaqə saxlaya bilərlər.
