VƏTƏN MÜHARİBƏSİNDƏ ŞƏHİD QİSMƏT ƏLİYEVİN DƏ QİSASI ALINDI.
Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala rayonu Aşağı Tala kənd sakini Əliyev Qismət Koroğlu oğludur.
Şəhidimiz haqqında daha çox məlumat əldə etmək məqsədilə Zaqatala rayonu Aşağı Tala kəndinə yollandıq.
Kənd camaatı ilə onun haqqında xeyli söhbətləşdik: Əliyev Qismət Koroğlu oğlu 1973-cü il avqustun 29-da Aşağı Tala kəndində anadan olub. Qismət 2 yaşında olarkən ailəsi rayon mərkəzinə köçmüşdür. O, 1990-cı ildə Zaqatala şəhər 2 nömrəli internat məktəbini bitirmişdir. Sonra rayonda yerləşən Kənd Təsərrüfatı Texnikumuna qəbul olmuş və arıçılıq ixtisası üzrə təhsil alıb. 1993-cü ilin marin 5-də texnikumu bitirən Qismət aprelin 6-da Milli Ordu siralarına çağırılıb. 28.08.1993-cü ildə Füzuli rayonu uğrunda gedən ağır döyüşlərdə şəhid olub.
Zaqatala rayonunun Aşağı Tala kəndində dəfn olunub.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Qismət Əliyevin də,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
