ZAQATALADA KİTAB FESTİVALI KEÇİRİLİB.

Zaqatala şəhər mərkəzinə xüsusi gözəllik verən “Dədə-Qorqud” meydanında
Zaqatala rayon Mərkəzləşdirilmiş Kitabxana Sisteminin təşkilatçılığı ilə “Heydər Əliyev İli” çərçivəsində "Kitab festivalı" keçirilib. Bu barədə Zaqatala rayon MKS-nin rəhbəri Leyla Məmmədova Diaspor.info saytının Şimal-qərb bölgəsinə məlumat verib.

Tədbirdə "Zaqatala Rayon İcra Hakimiyyətinin Başçısı Mübariz Əhmədzadə" başda olmaqla rayon hüquq-mühafizə orqanlarının rəhbərləri, Şəki Regional Mədəniyyət İdarəsinin rəisi, təhsil, səhiyyə, mədəniyyət işçiləri, şəhid ailələrinin üzvləri, qazilər, rayon ictimaiyyətinin nümayəndələri, yeniyetmə və gənclər iştirak ediblər. Festival Heydər Əliyev ideyalarını təbliğ etmək, yeniyetmə və gənclərin oxu vərdişlərini inkişaf etdirmək, mütaliəyə marağı artırmaq, kitabın gündəlik həyatımızın bütün sahələrinə daxil edilməsinə nail olmağı hədəf almışdır.
Zaqatala RİH başçısı Mübariz Əhmədzadə cənabları və rayon ziyalıları tədbirdə iştirak etməklə "Kitab" oxumağın nə qədər əhəmiyyətli olduğunu və gələcək nəsillərin daha intellektli, daha savadlı yetişmələri üçün vacib olduğunu təsdiqləyiblər.

Festivalda “Heydər Əliyev dünya tarixində nadir dövlət xadimlərindən biridir”, “Heydər Əliyevin dövlətçilik ideyaları”, “Heydər Əliyev və çağdaş Azərbaycan dövlətçiliyi”, “Heydər Əliyev və milli dövlətçilik təfəkkürü”, “Heydər Əliyev və azərbaycançılıq ideologiyası”, “Azərbaycan Ordu quruculuğunda İlham Əliyev mərhələsi”, “Ordu quruculuğu - səmərəli islahatlar, uğurlu nəticələr”, “Qalib ölkənin yenilməz ordusu”, “Zərifə Əliyeva - 100”, “Heydər Əliyev Fondu - Mədəni irsimizin hamisi” və s. başlıqlı sərgilər, “Mədəniyyətimizdə Heydər Əliyev izi”, "Heydər Əliyev və Azərbaycanda kitabxana işi", “Bir millət iki dövlət”, “Aerokosmik və texnologiya festivalları”, “Aprel döyüşləri”, “Zaqatala şəhidləri” və s. başlıqlı stendlər, banerlər hazırlanıb, seyricilərə təqdim edilib.
Oxucuların Səməd Vurğunun “Vaqif” poeması, “Hüseyn Cavidin “İblis” faciəsi, Cəlil Məmmədquluzadənin “Ölülər” əsəri və Hacı Zeynalabdin Tağıyevlə Sona xanımın dialoqu üzrə hazırladıqları səhnəcik qonaqların xüsusi marağına səbəb olub.

[center]

Festivalda “Heydər Əliyev İli” ilə əlaqədar kitabxananın başlatdığı "Kitab bağışlama aksiyası" çərçivəsində ilk kitab hədiyyələri Zaqatala RİH başçısı Mübariz Əhmədzadə tərəfindən verilmişdir. Belə ki, Mübariz müəllim tərəfindən kitabxananın fonduna Ulu öndər Heydər Əliyev haqqında yazılmış kitablar, rayon şəhidləri haqqında, o cümlədən yazıçı-jurnalist Əlmaniz Ələkbərlinin müəllifi olduğu "Zaqatala Şəhidləri" "Şanlı Tarix Yazanlar" kitabı və s. kitablar hədiyyə olunmuşdur.
Festival zamanı kitabxananın təşkil etdiyi şeir, rəsm və inşa müsabiqələrinin qalibləri Mübariz Əhmədzadə tərəfindən fəxri fərmanla təltif edilib.
Bundan başqa tədbirdə əl işlərindən ibarət sərgilər nümayiş olunub. Kitab satış yarmarkası da təşkil edilmişdir. Kitab bayramı konsert proqramı ilə davam edib.

Əlmaniz Ələkbərli
Azərbaycan Yazıçılar Və
Jurnalistlər Birliyinin Üzvü.
Diaspor.info saytının baş redaktoru.