ZAQATALA MƏDƏNİYYƏT MƏRKƏZİNDƏ 22 İYUL MİLLİ MƏTBUAT GÜNÜ İLƏ BAĞLI TƏDBİR KEÇİRİLİB.
Şəhid Anaları Onların Övladları Haqqında Kitab Yazmış Yazıçı-Jurnalisti Təbrik Etmək Üçün Zaqatala Mədəniyyət Mərkəzinə Gəlmişdilər.
22.07.2023- cü il tarixdə Şəki-Zaqatala Mədəniyyət İdarəsi Zaqatala rayon Mədəniyyət Mərkəzində “Milli Mətbuatımızın” yaranmasının 148- ci ildönümünə həsr olunmuş “Əkinçidən üzü bəri” mövzusunda tədbir keçirilib. Tədbirə “Birinci Qarabağ” və “Vətən Müharibəsində” şəhid olmuş qəhrəman oğullarımızın anaları da qatılmışdı. Tədbirin jurnalist qonağı olan “Qızıl qələm” Media Mükafatı Laureatı, “Regionda Media və Cəmiyyət” MMC-nin və Diaspor Təşkilatlarının Monitorinq Mərkəzinin sədri, Diqaspor.info saytının baş redaktoru, doqquz kitab müəllifi, Yazıçı-Jurnalist Əlimaniz Ələkbərli ilə mədəniyyət işçilərinin görüşü keçirilib.
Görüşü giriş sözü ilə “Zaqatala Mədəniyyət Mərkəzin” direktoru Aybəniz Heydərova açdı. Azərbaycan Respublikasının Dövlət Himni səsləndirildi. Vətən uğrunda canlarını fəda etmiş Şəhidlərimizin ruhu bir dəqiqəlik sükutla yad edildi.
“Azərbaycan Milli Mətbuatının dünəni, bu günü və sabahı” mövzusunda istedadlı Jurnalist Əlimaniz Ələkbərli çıxış etdi:-Milli mətbuatımızın təməli Həsən Bəy Zərdabinin təsisçisi olduğu “Əkinçi” qəzeti ilə qoyulub. Milli mətbuatımızın keçdiyi yola diqqət yetirsək Müstəqil Azərbaycan Cumhuriyyəti dövründə və daha sonra Sovetlər birliyi dövründə də, öz sözünü deyən qələm sahiblərimiz olub. Azərbaycan Respublikası ikinci dəfə müstəqilliyini elan etdikdən sonra “Müstəqil Mətbuatımız” da yenidən dirçəlməyə başladı. Birinci Qarabağ müharibəsi dövründə Azərbaycan həqiqətlərini dünyaya çatdırılması işində milli mətbuatımızın, jurnalistlərin rolu danılmazdır. Hər iki Qarabağ müharibəsi dövründə, Şəhid jurnalistlərimiz də oldu. O ki, qaldı müəllifi olduğum “Zaqatala Şəhidləri- Şanlı tarix yazanlar” “Dastana dönən şərəfli ömür” və Kəngərli şəhidləri, “Zəfər Tarixi Yazanlar” kitabları haqqında onu deyə bilərəm ki, tarix mütləq yazılmalıdır. Bu bizim şanlı tariximizdir və bu yolda az da olsa xidmətim vardırsa özümü xoşbəxt sayıram.
İkinci Qarabağ savaşı, 44 gün davam edən Vətən Müharibəsndə Şəhid olmuş Qəhrəman oğlumuz Orxan Cumayevin anası Rahilə xanım Cumayeva çıxışında oğlu Orxan Cumayev haqqında yazdığı kitaba görə yazıçı-jurnalist Əlimaniz Ələkbərliyə bütün Şəhid anaları adından təşəkkürünü bildirdi. Və özüylə gətirdiyi kitabdan müəllif imzaladıqdan sonra tədbir iştirakçılarına da, hədiyyə etdi. Vətən Müharibəsi Şəhidi Elvin Məmmədovun anası Tahirə xanım Məmmədova da öz çıxışı zamanı Şəhidlərimizin Qəhrəmanlığını işıqlandırdığı üçün bütün yazarları Peşə bayramı münasibətilə təbrik etdi. Birinci Qarabağ savaşında itkin düşən Afər Mütəllimovun anası Fatma Mütəllimova da çıxış edərək jurnalistlərə öz təşəkkürünü bildirib.
Daha sonra tədbirdə Yuxarı Tala Sənətkarlıq evinin metodisti Mirvari Vanatiyeva, Ulu Öndər Heydər Əliyev və bu gün də möhtərəm Prezidentimiz İlham Əliyev tərəfindən Jurnalistlərə göstərilən diqqət və qayğıdan söhbət açdı. Mədəniyyət Mərkəzinin bədii rəhbəri Samirə Hümbətova “Əkinçidən üzü bəri” mövzusunda geniş məruzə ilə çıxış etdi. Zaqatala rayonu Mədəniyyət İşçiləri Həmkarlar İttifaqı Zaqatala rayon komitəsinin sədri Sona xanım Qaziyeva tədbirdə iştirak edən Şəhid analarına və qazilərə öz minnətdarlığını bildirdi, o cümlədən jurnalist Əlimaniz Ələkbərlini və onun timsalında bütün jurnalistləri Şərəfli peşə bayramı münasibətilə təbrik etdi. Sona xanım Yazıçı-jurnalist Əlmaniz Ələkbərlini “Fəxri Fərmanla” təltif edildi.
Tədbir çay süfrəsi arxasında səmimi söhbətlə yekunlaşdı.
Diaspor.info
Zaqatala bürosu.