Yuxarı Tala Sənətkarlıq Evində Şəhid Ailələri Və Qazilərlə Görüş Keçirilib.
Bu gün "Yuxarı Tala Sənətkarlıq Evində Şəhid Ailələri Və Qazilərlə" görüş keçirilib. Tədbirdə Azərbaycan Yazıçılar və Jurnalistlər Birliyinin üzvü, AYB-nin Şimal-Qərb regional bölməsinin sədri Zaqatala Şəhidləri-Şanlı Tarix Yazanlar Kitabının müəllifi Əlmaniz Ələkbərli də iştirak edib. İlk sözü Yuxarı Tala Sənətkarlıq evinin müdiri Pirdovs Zamanova açaraq, əvvəlcə şəhidlərimizin ruhunu bir dəqiqəlik sükutla yad etməyi təklif etdi. Daha sonra sözü Milli Qəhrəman Natiq Məmmədovun atası Bəşir Məmmədova verdi. Bəşir Məmmədov tədbirin təşkilinə görə Yuxarı Tala Sənətkarlıq evinin kollektivinə təşəkkür etdi:siz hər dəfə bizi bir araya yığan zaman şəhidlərimizin ruhu şad olur.
Biz dövlətimizdən, onun Prezidenti İlham Əliyevdən çox razıyıq, Allah onun ömrünü uzun etsin və "Dəmir Yumruğunu" biraz da, möhkəm etsin. Biz bu gün alnıaçıq, başı dik gəzə bilirik, məhz şəhidlərimizin, qazilərimizin, müharibə iştirakçılarının və Ali Baş komandanımızın sayəsində. Siz mədəniyyət işçiləri də, bizim övladlarımızı tez-tez yad edirsiniz, dəyirmi masa və başqa görüşlər təşkil edirsiniz, buna görə həm rəhbər kimi Pirdovs xanım sizə, həm də, Kamilə xanıma ayrıca təşəkkürümü bildirirəm.
Daha sonra söz Şəhid Zəfər Murtuzəliyevin anası Əzizə anaya verildi. Əzizə xanım da, oğlu kimi digər Birinci Qarabağ Müharibəsinin şəhidlərinin ruhlarının şad olduğunu xüsusi vurğulayaraq dedi:-Biz Cənab Prezident, Ali Baş komandanımızın və bu igid oğullarımızın sayəsində Şuşaya ayaq basdıq, gəzdik, oğlumuzun ruhunun şad olduğuna əmin olduq. Allah Şəhidlərimizə rəhmət eləsin, qazilərimizə can sağlığı versin.
Daha sonra Pirdovs Xanım sözü Şəhid Afər Mütəllibovun anası Fatma anaya verdi. Fatma ana itkin düşmüş oğlu haqqında danışaraq, onun da, ruhunun şad olduğunu dedi:-müharibədən gəlmişdi evimizə, qızımın toyunda da, iştirak edib, geri qayıtdı. Dedim ki, ay oğlum biraz qal istirahət et, dedi ki, ay ana mən Əfqanıstan müharibəsi keçmiş adamam, sən darıxma mən sənə minlərlə erməni qulağı gətirəcəyəm. Heç nədən qorxmazdı, bütün bunlara baxmayaraq, o da, mədəniyyət sahəsinin adamı idi, gözəl qitara ifaçısı olub. Allah cəmi şəhidlərimizə rəhmət eləsin.
Sonra söz şəhid Məcid Balayevin anası Həlimət anaya verildi, o da, digər şəhid anaları kimi oğullarının qəhrəmanlığından danışaraq, ruhlarının artıq şad olduğunu dedi:-bu gün Qarabağımız azaddır bununla yalnız fəxr etmək lazımdır. Allah Şəhidlərimizə rəhmət eləsin.
Sonra söz qazilərimizə verildi, əvvəlcə Kəlbəcərdə döyüş yolu keçmiş Fuad Mikayılov daha sonra isə Yuxarı Tala Sənətkarlıq evinin işçisi, Qazi Yılmaz Nəsibli də danışaraq Şəhid valideynəri qarşısında baş əydiklərini dedilər və döyüş yolu haqqında, Azərbaycan əsgərinin açıq döyüşlərdə erməni quldurlarına necə dərs keçdikləri haqqında danışdılar.
Sonda söz Azərbaycan Yazıçılar və Jurnalistlər Birliyinin üzvü Əlmaniz Ələkbərliyə verildi:-hörmətli şəhid ata-anaları, qazilərimiz, hər birinizi ürəkdən salamlayıram. Bu görüşü təşkil edən Yuxarı Tala Sənətkarlıq evinin kollektivinə dərin təşəkkürümü bildirirəm. Mən bölgəmizdə sizdən qat-qat böyük mədəniyyət müəssisələri tanıyıram ki, sizin keçirdiyiniz tədbirlərin yarısını belə keçirmir. Buna görə sizə ayrıca minnətdarlığımı bildirirəm. Bu gün tədbirimizdə məndən əvvəl çıxış edənlər, Milli Qəhrəmanımızın atası da, qüdrətli dövlətimiz və Cənab Prezident İlham Əliyev haqqında danışdılar.
İstəyirəm biləsiniz ki, əgər Ümummilli lider Heydər Əliyev xalqımızın, dövlətimizin ağır günlərində paytaxt Bakıya gələrək, məhv olmaqda olan dövlətçiliyimizi qorumasaydı, bu gün nəinki bizlər, ümumiyyətlə Azərbaycan adlı dövlət belə olmayacaqdı. Ulu öndərin uzaqgörən siyasəti nəticəsində Azərbaycanda vətəndaş müharibəsinin qarşısı alındı, atəşkəs elan olundu və dövlətimiz iqtisadi gücünü artırmaq üçün böyük neft kontraktları imzaladı. Bundan sonra keçən otuz il ərzində dövlətimizin iqtisadi gücü, qüdrəti artdıqca, ordumuz da, ən müasir silahlarla təmin edildi. Heydər Əliyevə ömür vəfa etməsə də, onun siyasi varisi Ali Baş Komandan İlham Əliyev bu missiyanı sona çatdırdı. Otuz illik işğala son qoyuldu və dünyanın ən son texnologiyaları ilə müharibə apararaq, bir çox ölkələri mat qoydu. Dünya ilk dəfə idi ki, PUA, Kamikadzelərlə aparılan mükəmməl bir müharibənin şahidi olurdu. Bütün bunlara görə biz Ulu öndərimizə və cənab Prezidentimizə minnətdarıq.
Bu gün Azərbaycan Respublikasının Prezidenti İlham Əliyev diplomatiya sahəsində elə böyük nüfuz qazanıb ki, dünyanın ən aparıcı dövlətləri, dünyanın ən nüfuzlu təşkilat rəhbərləri öz çıxışlarında bunu xüsusi vurğulayır və ondan çox şey öyrəndiklərini etiraf edirlər. Məhz ali baş komandanımızın taktiki gedişləri sayəsində Azərbaycan ordusu minimum itki ilə müharibədə Zəfər çaldı. Allah bütün şəhidlərimizə rəhmət eləsin.
Diaspor.info
Zaqatala bölgəsi.