YAZIÇILAR BİRLİYİNİN REGİONAL BÖLMƏSİ ZAQATALA YAZARLARI İLƏ GÖRÜŞ KEÇİRİB.
Azərbaycan Yazıçılar Birliyinin yeni yaradılmış Şimal-Qərb Regional bölməsinin sədri Əlmaniz Ələkbərli Balakən və Qax yazarları ilə görüşdən sonra, tanışlıq üçün Zaqatala yazarları ilə də görüş keçirib. Görüş Zaqatala rayon Mədəniyyət mərkəzində baş tutub.Tədbiri giriş sözü ilə açan Zaqatala rayon mədəniyyət mərkəzinin direktoru Aybəniz Heydərova Azərbaycan respublikasının suverenliyi uğrunda və vətən yolunda canlarından keçən şəhidlərimizin ruhunu 1 dəqiqəlik sükutla yad etməyi təklif edib. Daha sonra Aybəniz xanım AYB Şimal-Qərb Regional bölməsinin yaradılmasını xoş qarşıladığını və həmin bölmənin mərkəzinin Zaqatalada olmasına sevindiyini bildirdi:- AYB Şimal-Qərb Regional bölməsinin açılması və həmin bölməyə yazıçı-jurnalist Əlmaniz Ələkbərlinin sədr seçilməsi təqdirə layiq haldır. Belə ki, Əlmaniz Ələkbərlini bir jurnalist kimi uzun illərdir tanıyırıq. Düşünürük ki, jurnalistikada olduğu kimi bu sahədə də ədalətli olacaq və Zaqatalanın ədəbi mühitinin inkişafı üçün əlindən gələni əsirgəməyəcəkdir. Tədbirdən sonra AYB-nin Şimal-Qərb Regional Bölməsinin sədri Əlmaniz Ələkbərli saytımıza kiçik müsahibə verərək, onun mahiyyətindən danışıb:- ilk öncə tədbirin keçirilməsi üçün bizə şərait yaradan Zaqatala RİH-nin başçısı Mübariz Əhmədzadə və Zaqatala rayon mədəniyyət mərkəzinin direktoru Aybəniz Heydərovaya təşəkkürümü bildirirəm. Zaqatala yazarları ilə keçirdiyimiz görüşün bir məqsədi var, rayonda ədəbi mühitin inkişafı üçün gənc yazarların önə çəkilməsi, ümumiyyətlə Zaqatalalı şair və yazıçıları Respublika ictimaiyyətinə tanıtmaq, azsaylı xalqların nümayəndələrinin öz ana dillərində yazdıqları yazıları dərc etmək vəs. ibarətdir. Tədbirimiz çox məsuldar keçdi, yazarların şeirləri ilə daha da maraqlı, rəngarəng oldu.
Daha sonra tədbirdə Zaqatalanın qocaman yazarlarından olan ağsaqqal Şirin Qəlbinur çıxış edərək yeni yaradılan bölməni alqışladı və regional bölmənin daha da, aktiv işləyəcəyinə, yazarların tez-tez bir araya gələcəyinə ümid etdiyini xüsusi vurğuladı. Yazıçı-jurnalist Əlmaniz Ələkbərlini təbrik edən Ş. Qəlbinur belə bir bölmənin açılmasına və həmin bölməyə sədr Əlmaniz müəllimin seçilməsinə çox sevindiyini xüsusi vurğuladı.
Sonra tədbirdə Şəhid anası, şairə-yazıçı Züleyxa Davudova da çıxış edərək, bu görüşün mədəniyyət evində keçirilməsini xoş bir hal olduğunu vurğuladı:- Əlmaniz Ələkbərlini yazıçı-jurnalist kimi illərdir tanıyıram. Zaqatala şəhidləri, “Şanlı Tarix Yazanlar” kitabını yazarkən bir Şəhid anası kimi mənimlə də görüşmüşdür. Onun son vaxtlar atdığı addımları yüksək qiymətləndirirəm və qəlbimdə Əlmaniz müəllimin heykəlini ucaltmışam. Son vaxtlar daha çox dini mövzularda yazırdım, demək olar ki, qələmimi yerə qoymuşdum, ancaq Əlmaniz müəllim ilə söhbətimizdən sonra məndə yenidən yazmaq eşqi oyandı. Mən ona inanıram, ümid edirəm ki, Zaqatalada ədəbi mühit bundan sonra daha da inkişaf edəcəkdir. 
Sonra uzun illər Zaqatala MKS-nin müdiri işləmiş yazıçı-publisist Gülniyar Məmmədova çıxış etdi:- Mən kitabxananın müdiri olduğum vaxtlarda Zaqatala yazarlarından kimin kitabı işıq üzü görərdisə, onun təqdimatını kitabxanamızda edərdik. AYB Şimal-Qərb regional bölməsinin açılması və Əlmaniz Ələkbərlinin həmin bölməyə sədr seçilməsi məni çox sevindirdi. Əlmaniz müəllim bütün ümidlərimiz sizədir, sizdən gözləntilərimiz daha çoxdur. 
Sonra Zaqatala şairləri bir neçə şeirlər söyləyərək, tədbiri daha da, maraqlı, rəngarəng etdilər.
Bundan əlavə tədbirdə Şakir İbrahimli, Şixamir Sultanov, Abdurrahman Ömərov, Nəbi Mülkümov, Güldənə Ramazanova, Şüküfə Göyçəli, Ömər Zutov, Nüsrət Musayev, Ömər Dəmirçioğlu və Rusif Məmmədov çıxış edərək yeni yaranmış AYB-nin Şimal-Qərb Regional Bölməsinə fəaliyyətində uğurlar arzulamışdırlar.
Sonda yazıçı-jurnalist Əlmaniz Ələkbərli müəllifi olduğu Şanlı Tarix Yazanlar, Şərəfli Ömür Yolu və Dastana Dönən Şərəfli Ömür kitablarını Zaqatala rayonunun yazarlarına hədiyyət etmişdir.
Sadiq Ələkbərli
Diaspor.info.
Zaqatala 
