16-09-2023-cü ildə AYB-nin Şimal-qərb regional bölməsinin sədri Əlmaniz Ələkbərli, Zaqatala şairlərindən olan Şakir İbrahimli və "Xalq qəzeti"nin bölgə müxbiri İlqar Həsənov Zaqatala rayon ağsaqqallarından olan, respublikada tanınmış Filoloq, öz araşdırmaları zamanı doğma el-obasının folklorunu, adət-ənənələrini qələmə alaraq üç kitab yazan, dəyərli ziyalı Sabir Qurbanovu ziyarət ediblər.
Belə ki, Zaqatala yazarları ilə görüş zamanı rayonda uzun illər Ali təhsil müəssisələrində müəllim olmuş, bir neçə kitabın müəllifi Sabir Qurbanov haqqında söhbət açılıb və yerli şairlər vurğulayıb ki, dəyərli ziyalımız səhhəti ilə bağlı tədbirə qatılmayıb. Həmin tədbirdə regional bölmənin sədri Əlmaniz Ələkbərli bildirib ki, Sabir müəllim tədbirə gələ bilmirsə onda biz onu ziyarət edərik. Və bir neçə gün sonra bu ziyarət baş tutub. Sabir Qurbanovun ailəsi, qızı Sevda müəllimə və kürəkəni Vaqif həkim qonaqları yüksək səviyyədə qarşılayıblar. Çay süfrəsi arxasında Sabir Qurbanov yazdığı şeirlərdən bir neçəsini səsləndirib. Daha sonra Sabir müəllim yazdığı kitablardan, doğma kəndi olan Kəpənəkçi kəndinin adının mənasından vəs. 
araşdırmalarından danışıb. Artıq səksən beşinci baharını yaşayan Sabir müəllimin nəinki yaşamaq eşqi, yazıb-yaratmaq eşqi də sönməyib, əksinə onun daha çox yazıb yaratmaq həvəsinin olması gənclərimizə bir örnəkdir.Sabir Qurbanovun ətrafında olan bütün qohumları təhsilli və yaradıcılıq eşqi olan insanlardır. Xuraman xanım hazırda Kəpənəkçi kəndinin bələdiyyə sədri olmasına baxmayaraq, o da yazıb yaratmaq həvəsi ilə yaşayır.Bizimlə birgə tədbirə qatılan Sabir müəllimin bacısı qızı Elmira Hacıyeva da uzun illər Dövlət qulluqçusu və xeyli vaxt 3 saylı orta məktəbin direktoru işləyib.
Tədbirdə şair Şakir İbrahimli və İlqar Həsənov çıxış edərək Sabir müəllimin fəaliyyəti haqqında danışıb və dəyərli ziyalımızın canlı tarix olduğunu deyiblər.
Sonda AYB Şimal Qərb Regional Bölməsinin sədri Əlmaniz Ələkbərli çıxış edərək Sabir müəllimin öz peşəsinə həmişə nüfuz gətirdiyini vurğulayıb. Qeyd edib ki, Sabir Qurbanov yaradıcılığının rəngarəngliyi nəzərə alınaraq ona AYB-nin Şimal-qərb regional bölməsinin üzvlük vəsiqəsini təqdim etmək istəyir.
Sabir Qurbanov onu ziyarət edən qonaqların hər birinə dərin təşəkkürünü bildirib. Və deyib ki, AYB Şimal Qərb Regional Bölməsinin dayaq məntəqəsi Zaqatalada yerləşdiyi üçün düşünür ki, bundan sonra bu rayonda ədəbi mühit daha da inkişaf edəcək. Sonda Əlmaniz Ələkbərliyə ona vəsiqə təqdim etdiyi üçün təşəkkür edib:bu vəsiqə mənim üçün çox dəyərli bir hədiyyə oldu.
Əlmaniz Ələkbərli də öz növbəsində Sabir Qurbanova söz verib ki, onun yubileyini böyük zallarda və təntənəli şəkildə təşkil edəcək.
Sadiq Ələkbərli
Diaspor.info
Zaqatala bürosu.
