QIZLARINIZA TƏHSİL VERİN.
Belə bir reallıq var ki, biz böyüdükcə hər dövrün özünəməxsus xüsusiyyətləri əmələ gəlməyə başladı, biz böyüdükcə, pisliklər də böyüdü.Nadanlar əldən düşdü və bizim böyüdüyümüz dövrdəki, bizimlə böyüyən uşaqlar, həmin nadanlarla əvəz olundu...
Bu, bütün dövrlər üçün eyni və təkrarlanan haldır...
Görün nə deyirəm;
Qızlarınızı bu cəmiyyətə adaptasiya etməyə çalışmayın, çalışın, onlar böyüyüb cəmiyyətin kiflənmiş, üfunət qoxan düşüncəsini yaxşı bir yöndə dəyişməyə addım atsınlar.Qızlarınıza cəsarətli olmağı, mərd və mübariz olmağı öyrədin.Öyrədin ki, özlərini çirkab dolu bataqlıqdan qoruya bilsinlər.Öyrədin ki, gələcəyə parlaq ümidlərlə baxa bilsinlər, gələcəyə ümid bəsləyən, gözəl insanlar yetişdirə bilsinlər.
Qızlarınıza savad verin, təhsil verin, istədikləri peşəyə yiyələnməyə kömək edin!
Tutun qızlarınızın əlindən, öpün onların alnından, oxşayın çiçək qəlblərini və daim irəliyə aparın!
Hər cür şərait yaradın ki, bu gül balalar kimlərdənsə asılı olmadan öz azad fikirlərini ifadə edə bilsinlər, özgələr tərəfindən manipulyasiya olunmasınlar!
Ən əsası, ən önəmlisi "qurban" funksiyasını yerinə yetirməyi özlərinə borc bilməsinlər, "sevgili" olsunlar, " ana" olsunlar, "bacı" olsunlar, amma əsla kiminsə qurbanı, köləsi olmasınlar!
Aytac İbrahim