Qurban bayramı ilə əlaqədar Balakəndə heyvan kəsimi
məntəqəsi fəaliyyətə başlayıb
Balakən rayonunda Qurban bayramı ilə əlaqədar çadır tipli mobil kəsim məntəqəsi fəaliyyətə başlayıb.
Rayonun Gərəkli kəndində fəaliyyət göstərən xüsusi məntəqə qida təhlükəsizliyi, eləcə də gigiyena standartlarına tam cavab verir. Balakən rayonunda ilk dəfə fəaliyyət göstərən xüsusi məntəqədə heyvanların kəsimi Azərbaycan Qida Təhlükəsizliyi Agentliyi (AQTA) ilə razılaşdırılmış qaydada, baytarlıq nəzarəti altında, sanitar-gigiyenik tələblər gözlənilməklə və İslam qaydalarına uyğun şəkildə həyata keçirilir. Burada kəsim prosesi heyvanların qəbulundan başlayaraq tam nəzarətli şəkildə təşkil olunur. Eyni zamanda tullantıların idarə olunması və vaxtında ərazidən daşınması təmin edilir.
Yaradılan bu infrastruktur təhlükəsiz və nəzarətli heyvan kəsiminin təşkili, eləcə də əhalinin keyfiyyətli xidmətlə təmin olunması baxımından mühüm əhəmiyyət daşıyır. Çadır tipli mobil kəsim məntəqəsinin fəaliyyət göstərməsi sakinlər tərəfindən razılıqla qarşılanıb.
Qeyd edək ki, İslam dünyasının birlik, bərabərlik və qardaşlıq rəmzi olan müqəddəs Qurban bayramı respublikanın hər yerində olduğu kimi, Balakən rayonunda da xoş əhvali-ruhiyyə ilə qeyd edilir. Bayram münasibətilə xüsusi ayrılmış kəsim məntəqəsində gigiyenik qaydalara və dini ənənələrə əməl edilməklə qurban kəsilib və aztəminatlı ailələrə göndərilib.
Sakinlər bu əziz gündə onlara göstərilən maddi və mənəvi dəstəyə görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildirib, Qurban bayramının xalqımız və millətimiz üçün xeyirli-uğurlu olmasını diləyiblər.
