Kaş yanında olaydım
Quş tək qanadlanaydım,Pəncərənə qonaydım,
İsti bir nəfəs olub,
Ürəyinə dolaydım.
Kaş yanında olaydım.
Öpəydim dodağını,
Bir də al yanağını,
Əzizim,sorağını
Gözlərindən alaydım,
Kaş yanında olaydım.
Dərdli,dərdsiz anında
Sürünəydim yanında.
Gülüm sənin yolunda
Saralaydım,solaydım.
Kaş yanında olaydım.
Eşqinlə alışaydım,
Oduna tutuşaydım.
Sevginin atəşində
Yar sənə qovuşaydım.
Kaş yanında olaydım.
Gül olub açılaydım,
Günəş tək saçılaydım,
Təki sənin əlinlə
Kəsilib asılaydım.
Kaş yanında olaydım.
Kaş yanımda olaydın...
Neyləyim
Telefona baxa-baxa qalmışam
Nə səsin var,nə sorağın,əzizim.
Gözümdən yaş axa-axa qalmışam
Dərd üstə dərd ələnibdi,neyləyim.
Kaman üstə köklənibdi dərdlərim
Dərd yazmağa yox varağım,əzizim.
Göydə Allah,yerdə sən Peyğəmbərim
Qəlbim qəmə bələnibdi,neyləyim.
Sarı simdə inildərəm,ağlaram
Şimşək ollam,bulud kimi çağlaram.
Tutuşaram,alışaram,yanaram.
Ümidsiz eşq dillənibdi,neyləyim.
Gözlərini ver yadigar saxlayım.
Sözlərini qəlbimdə varaqlayım.
Gah kövrəlim,gah doyunca ağlayım.
Sənsiz qəlbim millənibdi,neyləyim.
Sən yanıma gəlməsən
Gözlərimə nəm dolar,
Ürəyimə qəm qonar,
Damarımda qan donar,
Sən yanıma gəlməsən.
Gözlər bələnər yaşa,
Ağ qar ələnər başa,
Baharım dönər qışa,
Sən yanıma gəlməsən.
Ay gül üzlü baharım,
Sevimli gözəl yarım,
Qalmaz səbri-qərarım,
Sən yanıma gəlməsən.
Mən Leyliyə dönərəm,
Közərərəm,sönərəm.
Vallah sənsiz ölərəm
Sən yanıma gəlməsən.
Nələr gəlsə başıma,
Yazarsan yaddaşına,
Ağlarsan baş daşıma
Sən yanıma gəlməsən.
Vicdan nədir,soruşma
Mərdə namərd damğasını vurandan,
Vəzifəyçün dostuna tor qurandan,
Şər,böhtanla düz üzünə durandan,
Vicdansızdan "vicdan nədir?"-soruşma.
Vətənini düşmənlərə satandan,
Arvadını yad qoynuna atandan,
Haram pulla arzusuna çatandan,
Vicdansızdan "vicdan nədir?"-soruşma.
Özgəsinin zəhmətini yeyəndən,
Hara getsə tək özündən deyəndən,
Çanaq bəyənməyib,cinsi geyəndən,
Vicdansızdan "vicdan nədir?"-soruşma.
Namus nədir,qeyrət nədir,ar nədir,Arsız-arsız söyləyər:"nəmənədir?"
Damara yapışan qara gənədir,
Vicdansızdan "vicdan nədir?"-soruşma.
Züleyxayam,məzlumun haqq səsiyəm.
Gedişim düz,gəlişim düz,yolum düz.
Son nəfəsdə yenə də deyəsiyəm,
Vicdansızdan "vicdan nədir?"-soruşma!
