TAMAMLA BU ZƏFƏRİ!
AZƏRBAYCAN ƏSGƏRİ!
ALLAH ORDUMUZU QORUSUN!
Yenə qartal baxışın
Dikilib Xankəndinə.
Sən Şuşamın fatehi,
Bax qalan son tikənin
Sərhəddinə, səmtinə.
Oy yağının gözünü!
Arxanda bir el durur!
Dalğalanan, kükrəyən
Daşacaq bir sel durur!
Min atına " Cəngi" çal!
Gülsün ağlar Xocalın!
Tamamla bu zəfəri!
Azərbaycan əsgəri!
Darıxıram.
Bu necə nisgildi, necə ağrıdı,
Nə buzu açılır, nə də sazağı.
Soyunub tökəndə payız yarpağı.
Əynimə biçmişəm mən darıxmağı.
Masanın üstündə vurnuxur qələm,
Ürək qəlpə kimi sıxıb göynədir.
Mən rəssam deyiləm, de necə çəkim?
Biləsən darıxmaq hansı rəngdədir.
Sığınar yer göyə, cocuq anaya,
Bir köynək yol qalar toxtamağına.
Könlümü bir duyğu ala- almaya,
Durub sarılaram darıxmağıma.
Adı sorulmaz
Budur, üfüqlərin dan ərəfəsi,
Gecəni diriltdim, yenə gözümdə.
İçimdə sarsılan kor düşüncəmin,
Üstündə oturub bitdim özüm də.
Nə ağır olurmuş özünün hökmü,
Təsdiqi , inkarı suala dönür.
Xərclənib qurtaran qara pul kimi
Bircə an içində qumara dönür.
Göymü guruldayır, xəzanmı ötür?
Havalar soyuyur pəncərəmizdə.
Ulduzlu naxışlar çəkilib gedir,
Gecə tərin tökür nəm şüşəmizdə.
İçindən boğulmaq ölümdən betər,
Səsindən kimsənin xəbəri olmaz.
Ruhu diriltməyə bircə söz yetər,
Möhürlü sənədin adı sorulmaz...
ALLANAR ADAM
Payızın günəşi yayı gətirməz,
Bürküsündən çaşıb hallanar adam.
Vaxt çapar at kimi, xəbərin olmaz,
Heç kəs yox özünə allanar adam.
Dilin acı tapmaz, çəkib gedəsən,
Xatirən nəmlədər kipriklərimi.
Sən rəssam deyilsən, hardan biləsən,
Fırça əllərimin çəkdikıərini?!
Bir az danışarıq "Soyuq günəş"dən,
Bəlkə də günəşdən donub ölən var.
Kül altda səngiyib sönən atəşdən,
Param- parça olub, tən bölünən var.
Payızın günəşi yayı gətirməz,
Bürküsündən çaşıb hallanar adam.
Vaxt çapar at kimi, xəbərin olmaz,
Heç kəs yox özünə allanar adam...
Payız
Gözəllik, təntənə, qızıl taxt, saray,
Çıxmısan taxtına, şahmısan, payız?!
Mən ki, sevməmişəm səni heç zaman,
Bəs niyə ruhuma hopmusan, payız?!
Sevən könüllərin toyu, büsatı,
Qızıla döndərib vaxtı, saatı,
"Murad" dediyimiz o köhlən atı,
Səyirdib arxamca çapmısan, payız!
Bahardan uzaqsan, yaydan uzaqsan,
Bir az nisgillisən, bir az sazaqsan,
Öz qızıl taxtından düşmə uzaq sən,
"Fil qulağında"mı yatmısan, payız!?
O dağ zirvəsindən əzəmət gətir,
Sevən urəklərə mərhəmət gətir,
Təzə meyvələrdən yığ, səbət gətir,
Yoxsa köhnələri atmısan, payız!?
Durub qabağından qaça bilmirəm,
Durna qatarıyla uça bilmirəm,
Nə sirrdir, sehirdir aça bilmirəm,
Məni qabağına qatmısan, payız!
Deyəsən ruhuma hopmusan, payız!