BİZ QALİB GƏLDİK .
Buz bağladıq soyuğunda- qışında,
Tarix yazdıq çınqılında- daşında.
Yallı getdik Murovdağın başında,
Bu savaşda mətinləşdik, bərkidik,
Biz qalib gəldik .
Nifrətimiz hədəf oldu süngüyə,
Barmağımız qaynaqlandı tətiyə,
Bayraq sancdıq Xudafərin körpüyə,
Ucaldı başımız, qalxdıq, dikəldik,
Biz qalib gəldik .
Çəkinmədik nə ölümdən, nə qandan,
Vətən üçün keçdik şirin canından.
Nərə çəkdik; ölümə ölüm, qana qan,
Düşmən taxtı alt üstünə çevirdik,
Biz qalib gəldik.
YOL GEDİRƏM .
Bürünüb dərviş libasa ,
Bir əlimdə dəmir əsa,
Batıb qəmə,bstıb yasa,
Gündüz- gecə yol gedirəm.
Boylana önə- arxaya ,
Gah sevinə, gah ağlaya.
Saqqalımı tumarlaya
Gecə- gündüz yol gedirəm.
Üz tutmuşam zirvələrə,
Ayaq altda uçrum- dərə.
Bata- bata al qan, tərə ,
Gecə- gündüz yol gedirəm.
Heybəmdə var bircə xurma,
Kəsib yolum bığıburma.
Mənzil uzaq, haydı,, durma,
Gecə- gündüz yol gedirəm.
Gedim, çatım muradıma ,
Rəhmət deyilsin adıma.
Düşübdür cənnət yadıma,
Gündüz- gecə yol gedirəm.
YUXU.
Yuxu gordüm bu gecə;
Məzarımı ot basmışdı.
Gül ləçəyi şehli idi,
Yəqin , kimsə ağlamışdı.
Rəngi solmuş başdaşıma
Qara yaylıq bağlamışdı.
Tapdanmışdı o dar cığır,
Ləpir ayaq başmağıydı.
Yellənən o qara yaylıq
Bir gözəlin yaşmağıydı.
Mən ölsəm də, yaşayırmış
Nakam eşqin əzabları.
Yer üzünün bir gözəli,
Ölçür- biçir bu yolları.
Söz tapmıram bu eşqə mən,
Ləpir vüsal sorağıydı.
Yellənən o qara yaylıq
Məzarımın bayrağıydı.
ANAMI AXTARIRAM.
Yaş gəldikcə yaş üstə,
Anamı axtarıram.
Yaş axır balış üstə,
Anamı axtarıram.
Solur ömür güllərim,
Gərgin keçir günlərim.
Əsir daha əllərim,
Anamı axtarıram.
Arxasızdır kürəyim,
Kövrək olub ürəyim.
Anam olub gərəyim,
Anamı axtarıram.
Gözüm yola dikəlmiş,
Yazıq ürək nə çəkmiş,
Qocaya da gərəkmiş,
Anamı axtarıram.
Allah bilir ağrımı,
Hicran yaxır bağrımı.
İtirmişəm ağlımı,
Anamı axtarıram.
