Sevir? Sevmir?
Göy çəməndə gəzərdik ,
Bu çiçəyi üzərdik.
Ləçəyini qoparıb,
Pıçıltıyla deyərdik :
- Sevir , Sevmir ?
Hərdən təngə gələrdik ,
Sevinib , qəmlənərdik .
Yalvarardıq Allaha ,
Dua edib deyərdik :
- Sevir , Sevmir .
Necə də sevinərdik
Ləçəyi düz gələndə.
Sanki göydə süzərdik ,
Eşq gölündə üzərdik:
- Sevir ! Sevmir?
Bəzən də düz gəlməzdi ,
Ruhumuz da gülməzdi.
Qaynar ürəyimizdə
Sanki qan da donardı.
Kədərli baxışlardan
İki sual qopardı :
- Sevir ? Sevmir ?
İlkin, saf duyğuların
Nizamıdır bu çiçək .
Hamı sevsin- sevilsin ,
Ətirindən nur içək .
Sevgimizin qisməti
Qalmasın gül ləçəyə .
Sevgi günəşi doğsun
İşıqlı gələcəyə .
DAĞLAR MƏNİ TƏK QOYMADI .
Uzaq düşdü qohum- qardaş,
Dağlar məni tək qoymadı.
Qocalsam da yavaş- yavaş,
Dağlar məni tək qoymadı.
Sübhi- tezdən salamladı ,
Tütək- neylə qarşıladı .
Güldən çələng bağışladı,
Dağlar məni tək qoymadı.
Zirvəsinin bəyaz qarı ,
Qartallardır dostu - yarı .
Ömrümün dövləti - varı ,
Dağlar məni tək qoymadı .
Sal qayadan Təkə baxar ,
Dərəsindən sellər axar.
Ürəyimə fərəh yağar ,
Dağlar məni tək qoymadı .
Vəcdə gəlib Osman Ümman ,
Sözlərimdə yoxdur yalan.
Ömrüm olar vallah, viran,
Dağlar məni tək qoymadı.