Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala rayonu Muğanlı kənd sakini Süleymanov Ramazan Süleyman oğludur.
Şəhidimiz haqqında daha çox məlumat əldə etmək məqsədilə Zaqatala rayonu Muğanlı kəndinə yollandıq.
Və şəhidin doğmalarıyıa, kiçik qardaşı Sahiblə görüşüb, xeyli söhbətləşdik.
Süleymanov Ramazan Süleyman oğlu 28.09.1974-cü ildə Zaqatala rayonu Muğanlı kəndində anadan olub. 02.01.1994-cü ildə şəhid olub. 09.01.1994-cü ildə dəfn olunub.
Muğanlı kənd orta məktəbini və Sürücülük məktəbini bitirib. Könüllü olaraq, yaşı çatmasa da, Ağdama döyüşə gedib. 7 ay xidmət edib. Hərbi komissarlığa onu zorla gətiriblər və onu yenidən həqiqi hərbi xidmətə aparıblar. Əvvəlcə Qusarda, sonra isə Sumqayıt şəhərində, Nasosnuda təlim keçməyə başladı. Sonra Beyləqan, Füzuli, Ağdam ətrafında gedən döyüşlərdə iştirak edib. Batalyonun bütün üzvləri şəhid olduğuna görə evə gəlmişdi. 01.01.1994-cü ildə yenidən geri çağırdılar. Cəmi bir həftə evdə istirahət etdikdən sonra yanvarın 1-də geri getdi. Yeni yaranmış batalyonda xidmətə başlayıb və həmin gecə də, şəhid olub.
Biz ailədə 4 uşaq olmuşuq, 3 qardaş 1 bacı. Atamız dünyasını dəyişib.
Qardaşım yaşı catmayan vaxtlarında atıcı olub, rəsmi çağırışla gedəndən sonra isə, təlimlər keçərək, qranatomyotu öyrənib. Şəhid olan vaxtı dostları bizə gəlmişdilər və deyirdilər ki, bir neçə erməni tankını vurub. Sonuncu qəhramanlığı isə bunkerdə gizlənən 12 kəşfiyyatçının yerini müəyyən edib qranatla onları vurub.
Uşaqlıqdan silaha çox marağı olub. Hətta özü silah düzəldirdi. Sərrast atmağı da, uşaqlıqdan öyrənmişdi.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Ramazan Süleymanovun da,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
