Ermənistan artıq növbəti seçkiyə getməyə hazırlaşır və bu digər seçkilərdən fərqli olaraq parlamentdə keçirilən bir seçkidir.Bu sözləri Diaspor info-ya verdiyi açıqlamasında "Beynəlxalq Münasibətlər və Diplomatiya Araşdırmaları Mərkəzi"nin rəhbəri, politoloq Samir Hümbətov deyib.
Politoloq qeyd edib ki, Ermənistandakı indiki durum mahiyyət etibarilə o qədər də ciddi dəyişiklik yaratmır.
"Ermənistanda prezidentin səlahiyyətləri baş nazirə nisbətən çox məhduddur və demək olar ki, prezident orada bir formal xarakter daşıyır, amma yenə də vəzifə olaraq boş qalması hökümət, dövlət tərəfindən normal qarşılanmır. Ona görə də hesab edirəm ki, qoyulan vaxt çərçivəsində və ondan sonrakı mərhələdə seçkinin keçirilməsi gözləniləndir.
Burada bir neçə sual ortaya çıxır ki, Ermənistanda növbəti prezident kim olacaq? Yaxud da kimlər tərəfindən təyin olunacaq və seçkinin aqibəti necə olacaq? Bununla bağlı hələ ciddi bir fikir yoxdur, yəni tam şəkildə rəsmi namizədlər irəli sürülməyib və ona görə də sadəcə ehtimalla demək də fikrimcə o qədər doğru olmazdı. Çünki, vəziyyət hər gün, hər saat dəyişə bilər, amma hesab edirəm ki, bu seçkidə Nikol Paşinyanın dəstək verdiyi şəxslərin, yaxud şəxsin olacağı böyük ehtimal ki, var və düşünürəm, artıq Nikol bununla bağlı özünün namizədini hazırlayır, ya da hazırlayıb, bu seçkidə də irəli sürəcək. Nəzərə alsaq ki, Nikolun fraksiyası da artıq parlamentdə böyük üstünlüyə malikdir, o zaman həmin şəxsin seçilməsi ehtimalı böyükdür.
Düşünürəm ki, bu seçki iki aydan sonraya, yaxud daha sonraya təyin oluna bilər, çünki indiki vəziyyətdə Türkiyə-Ermənistan danışıqları və digər məsələlər gedir. Hesab edirəm ki, Nikol cəmiyyətin başını oraya tam qarışdırmaq istəmir və indiki vəziyyətdə hökumətin də başını buna qarışdırmaq istəmir və qarşısında duran məsələləri həll etməyə çalışır, amma növbəti mərhələdə, iki ay, iki ay yarım, üç ay sonra ola bilsin ki, parlament daxilində yeni bir seçki keçirilib prezidentin seçilməsi mümkün olacaq. Ehtimal ki, Ermənistan növbəti dəfə artıq yenidən qayıdacaqdır referendum vasitəsi ilə prezident idarə üsuluna. Nikol əslində bütün gücü ilə çalışır ki, özünün yolunu açsın və baş nazirdən sonra artıq prezident seçkilərində iştirak edib prezident kimi hakimiyyətini davam etdirsin. Fikrimcə vəziyyət bundan ibarətdir və gözlənilən də odur ki, Nikol öz komandasından ona sadiq olanları seçə, onlardan da bir və ya bir neçəsinin də namizədliyini verə bilər”
Müəllif: İnam Hacıyev
35
