ŞƏHİD NİCAT XƏLİLLİ MÜASİR TARİX YAZANLARDANDIR.
Uzun illər üzünə həsrət qaldığımız torpaqlarımıza bizi qovuşduran Qəhrəman şəhidlərimizin ziyarətini davam etdiririk. Zaqatala rayonu Muğanlı kəndində İkinci Qarabağ savaşı, “Vətən Müharibəsi” şəhidi Xəlilli Nicat Əli oğlunun valideynləri ilə görüşüb, söhbətləşdik. Nail kişi özündən güc tapıb, kamera arxasında bir –iki kəlmə danışdı:”Nail ailənin ən kiçiyi idi, özündən əlavə bir qardaşı, bir bacısı da, var. Orta məktəbi bitirdikdən sonra sürücülük məktəbinə daxil oldu, oranı bitirib,
həqiqi-hərbi xidmətə yola düşdü. Xidmətini kişi kimi başa vurub geri gəldi. Usta işləyirdi, müharibə başlanan kimi könüllü olaraq, adını səfərbərlik idarəsinə yazdırıb. Hər gün işdən evə gələn kimi anasından soruşurdu ki, məni axtarmırlarki, evə zəng etməyiblər? Deyirdim ay oğul niyə tələsirsən, vaxtı çatanda sən də, gedəcəksən.”
Daha sonra anası Bəsti Xəlilova da, söhbətə qoşuldu:” evimin ən şirini, sonbeşiyim idi. Özünü çox sevdirmişdi bizə. Hərdən üstünə acıqlanırdım, mənə deyirdi ki, vaxt gələcək siz mənimlə fəxr edəcəksiniz. Elə bil Şəhid olacağını əvvəlcədən bilirdi. Mən oğlumla fəxr edirəm, o vətənə olan kişilik borcunu ödədikdən sonra kəndimizdə usta işləyirdi.
Kimin nə işi olurdusa ona deyərdi, hamının köməyinə çatan idi. Odur ki, onun xətrini hamı istəyirdi. Döyüş yoldaşları bizə gələn vaxtı dedilər ki, bizlərin hər birini cərgəyə düzmüşdülər və sual verdilər ki, kim kəşviyyatçı olmaq istəyir? Nicat irəli çıxaraq, deyib ki, birinci mən gedirəm. Komandiri isə onun kürəyinə əlini vuraraq, deyib ki, səni böyüdən Ata-anaya halal olsun.
Bir sonbeşiyim kimi onun da, arzularının həyata keçməsini istəyirdim, ailə qursun, övladları olsun. Nəvəmə Nicatın adını vermişik.”
Bəli, 44 günlük Vətən müharibəsi zamanı, başda Ali baş komandan İlham Əliyev olmaqla Azərbaycan əsgəri tarix yazdı. Nicat Xəlilli də, həmin şanlı tarix yazanlardan oldu.
Nicat Əli oğlu Xəlillini oxucularımıza tanıtmaq üçün onun haqqında bildiklərimizi olduğu kimi yazırı:”
Nicat Xəlilli 1994-cü il dekabrın 9-da, Zaqatala rayonunun Muğanlı kəndində anadan olub. 2001-2012-ci illərdə O. Rəsulov adına Muğanlı kənd tam orta məktəbində təhsil alıb. Nicat Xəlilli 2013-cü ildə müddətli həqiqi hərbi xidmətə çağırılıb.
2013-2014-cü illərdə Azərbaycan Silahlı Qüvvələrinin “N” saylı hərbi hissəsində xidmət edib.
Azərbaycan Silahlı Qüvvələrinin əsgəri olan Nicat Xəlilli 2020-ci il sentyabrın 27-də, Ermənistan işğalı altında olan ərazilərin azad edilməsi üçün başlanan Vətən müharibəsi zamanı Kəlbəcər və Murovdağın azadlığı uğrunda gedən döyüşlərdə iştirak edib.
Nicat Xəlilli oktyabrın 9-da, Kəşfiyyat bölüyündə Goranboy rayonu, Gülüstan kəndi istiqamətində keçirilən hərbi əməliyyatlar zamanı şəhid olub. Zaqatala rayonunun Muğanlı kənd qəbirstanlığında torpağa tapşırılıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 15.12.2020-ci il tarixli Sərəncamına əsasən Nicat Xəlilli ölümündən sonra "Vətən uğrunda" medalı ilə təltif edildi. Daha sonra 24-06-2021 ci il tarixli sərəncamla "Cəsur döyüşçü” və “Suqovuşanın azad olunmasına görə” medalları ilə də, təltif edilib.
Muğanlı kəndinin bütün şəhidləri, o cümlədən Nicatın da rəsmi olan abidə-kompleksi yaradılıb ki, bu da, öz növbəsində Şəhidlərin heç vaxt unudulmayacağından xəbər verir.
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
212
