ŞƏHİD İLHAM ƏHMƏDOV BİRİNCİ QARABAĞ SAVAŞINDA CANINI VƏTƏNƏ FƏDA EDƏNLƏRDƏNDİR.
Birinci Qarabağ savaşı başlayan zaman İlham Əhmədovun yaşı az olduğuna görə vətənin müdafiəsinə qalxa bilmirdi. 1992 –ci il həqiqi hərbi xidmətə çağrılan zaman İlham üçün toy-bayram idi. Həmin dövrdə bütün kişilər Qarabağa, erməni seperatçılarına qarşı döyüşməyə getməyə can atırdı. Baxmayaraq ki, yenicə müstəqilliyini elan etmiş Azərbaycan dövlətinin nizamlı ordusu yox idi. Vətənini sevən, vətənpərvər, igid, cəngavər oğullarımız öz aralarında danışaraq, batalyonlar yaratmış və bu batalyonlar vasitəsilə vətənin müdafiəsində dayanırdılar. Qarabağ savaşında Zaqatala batalyonunun da, özünəməxsus xidmətləri olmuşdur.
Şəhid Əhmədov İlham Mahmud oğlu da, Zaqatalanın qəhrəman oğullarındandır. Şəhidimizi oxucularımızla yaxından tanış etmək məqsədilə onun haqqında bildiyimiz bəzi məlumatları olduğu kimi yazırıq: Əhmədov İlham Mahmud oğlu 10.10.1973-cü ildə Zaqatala rayon Gözbarax kəndində anadan olub. Ailədə 4 uşaq olublar, 2 bacı 2 qardaş . İlham evin sonbeşiyi olub.
1988-ci ildə Gözbarax kənd orta məktəbinin 8-ci sinifi bitirib. 1988 -ci ildə Qaxda peşə məktəbini oxuyub. 1989-90 cı illərdə isə kolxozda çalışıb. Texnikaya meyli daha çox olub. Ona görə də, traktorçu peşəsinə yiyələnib.
Bundan əlavə uşaq vaxtlarından heyvandarlığa, kənd təsərrüfatına çox meyilli olub. At sürməyi çox sevib, at belində dağlarda daha çox vaxt keçirib.
Belə ki, kənd yeri olduğuna görə və qoyun –quzu saxladıqları üçün tez-tez dağlara gedib. Bundan əlavə tütün, barama və s. kənd təsərrüfatı məhsullarının istehsalı ilə də, çox ciddi məşğul olurdu. 1992-ci ildə isə həqiqi hərbi xidmətə çağrılıb.
İlham Əhmədov əvvəlcə Bakıda Prezident Qvardiyasında xidmət edib. Bir müddət sonra evlərinə gəlib və yenidən geriyə, hərbi xidmətinə qayıdıb. Ancaq bu dəfə Bakıya deyil, Ağdama, birbaşa açıq döyüşlərə qatılmaq üçün cəbhəyə gedib. Ağdam rayonu Qazançılar kəndi uğrunda gedən şiddətli döyüşlərdə itgin düşüb. Atası Mahmud Əhmədov və anası Pirdovs Əhmədova rəhmətə gediblər.
Allah Bütün Şəhidlərimizə Rəhmət Eləsin!
Bu gün İlham kimi bütün şəhidlərimizin qisası alındığına görə onların ruhu şaddır. Belə ki, İkinci Qarabağ savaşı ”Vətən müharibəsi “ başlayan gündən müzəffər Azərbaycan ordusu döyüş meydanında erməni əsgərini diz çökdürdü. Cəmi 44 gün ərzində erməni cəlladlarını ağ bayraq qaldırmağa məcbur edən Azərbaycan əsgəri, Vətən müharibəsində öz gücünü bütün dünyaya sübut etdi.
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.
460