ŞƏHİD TEYMUR ƏLİYEV ZAQATALA RAYONU ƏLİABAD QƏSƏBƏSİNİN İLK ŞƏHİDİDİR.
Birinci Qarabağ müharibəsində azərbaycanın nizamlı ordusu olmadığına görə daha çox təcrübəli əsgərlərə üstünlük verilirdi. Belə ki, sovet ordusunda xidmət edənlər təcrübəli olduqlarına görə müharibəyə daha çox onlar çağrılırdı. Teymur Əliyev də, təcrübəli əsgər kimi vətənin keşiyində ilk dayanan qəhrəmanlarımızdandır. Belə ki, onun 1992-ci ildə İrkutski şəhərində, hərbi xidmətdə olduğu zaman qazandığı hərbi biliklər, Qarabağ döyüşlərində karına gəlmişdir.
Şəhid Teymur Əliyev haqqında bildiyimiz bəzi məlumatları olduğu kimi oxucularımıza təqdim edirik: Əliyev Teymur Bəliyar oğlu 1972-ci ilin mayın 27-də Zaqatala rayonunun Əliabad qəsəbəsində anadan olub. 1992-ci ildə müddətli həqiqi hərbi xidmətə çağırılıb. 1992-ci il sentyabrın 4-də Laçın rayonu uğrunda gedən döyüşlərdə həlak olmuşdur. Zaqatala rayonu Əliabad qəsəbəsində dəfn olunub.
Şəhidimiz haqqında daha ətraflı məlumat toplamaq üçün onun bibisi Kərimova Mehriban müəllimə ilə görüşüb, söhbətləşdik: Teymur balacalıqdan çox dəcəl olub. Rus bölməsini bitirib.
O, uşaqlıqdan heç nədən, itdən belə qorxmazdı, hətta ilanı əlində gəzdirərdi.
Şəhid haqqında bildiyim məlumatları sizinlə də, bölüşə bilərəm. Əliyev Teymur Bəliyar oğlu 1972-ci il mayın 27-də Zaqatala rayonunun Əliabad qəsəbəsində anadan olmuşdur. Teymurgil ailədə 10 uşaq olublar, 3 qız 7 oğlan. Teymurun valideynləri rəhmətə gedib. Teymur 1992-ci ildə İrkutski şəhərində hərbi xidmətdə olub. Azərbaycana geri gəldikdən sonra Könüllü olaraq Zaqatala batalyonuna qoşulub. Füzuli rayonu Horadiz qəsəbəsində xidmətə başlayıb. Məzuniyyətə gəlmişdi, dedi ki, bu mənim son gəlməyim ola bilər çünki çox gərgin döyüşlər gedir. Elə də, oldu 1992-ci il sentyabrın 4-də Laçında Xoçaz dağı uğrunda gedən döyüşlərdə şəhid olmuşdur.
Kənd sakini Əhməd Əhmədov da, şəhidimiz haqqında danışdı: Teymurla mən tay-tuş olmuşuq. Çox mərd oğlan idi. Əliabad qəsəbəsinin ilk şəhididir. Ona görə də qəsəbənin mərkəzində Mədəniyyət evinin qarşısında dəfn olunub. Əvvəl kənd camaatı düşünürdü ki, biz buranı şəhidlər xiyabanı edəcəyik, sonra hər kəs öz şəhidlərini yaxınlıqlarındakı qəbristanlıqda dəfn etdilər.
Ali Baş Komandan İlham Əliyevin rəhbərliyi ilə aparılan və cəmi 44 gün çəkən Vətən müharibəsi zamanı bütün şəhidlərimiz kimi, Teymurun da, qisas alındı.
Bu gün onların hər birinin ruhları şaddır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər və
Yazıçılar birliyinin Üzvü.
413