ŞƏHİD MƏMMƏD MAKAROVUN UĞRUNDA ÖLDÜYÜ TORPAQLARDA AZƏRBAYCAN ƏSGƏRİ DAYANIR.
Birinci Qarabağ müharibəsi başlayan zaman, Azərbaycan nəinki müharibəyə hazır deyildi, hətta ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala rayonu Danaçı kənd sakini Makarov Məmməd Tacəddin oğludur. Məmməd Makarovla bağlı ətraflı məlumat toplamaq məqsədilə Zaqatala rayonu Danaçı kəndinə yollandıq. Şəhidimiz haqqında əldə etdiyimiz məlumatları oxucularımıza da, təqdim edirik:
Makarov Məmməd Tacəddin oğlu 1974-cü il mayın 12-də, Zaqatala rayonunun Danaçı kəndində anadan olmuşdur. Danaçı kənd 1 saylı orta məktəbi bitirmişdir. Orta məktəbi əla və yaxşı qiymətlərlə oxuyan Məmmədin arzusu coğrafiya müəllimi olmaq idi.
Birinci ili ali məktəbə imtahan vaxtı müsabiqədən keçə bilməsədə ruhdan düşməmiş, növbəti ili sənədlərini vermək üçün ciddi hazırlaşıb.
Lakin amansız müharibə şəhidimizin arzularını puça döndərdi. 1992-ci il Milli ordu siralarına çağırılan Məmməd əvvəlcə Sumqayıtda və Qusarda hazırlıq keçdikdən sonra Laçına göndərilmişdir. M. Makarov Laçın uğrunda gedən şiddətli döyüşlərdə qəhrəmancasına həlak olmuşdur.
Danaçı kənd qəbristanlığında dəfn olunmuşdur.
Valideynləri Zaqatala rayonunun Danaçı kəndində yaşayırlar.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Məmməd Makarovun da, qisası alındı, bu günün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.