ŞƏHİD ARİF ŞABANOVUN DA, RUHU ŞADDIR, ÇÜNKİ VƏTƏN MÜHARİBƏSİNDƏ ONUN DA, QİSASI ALINDI.
Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala rayonu Üçüncü Tala kənd sakini Şabanov Arif Nəsrullah oğludur.
Arif haqqında daha çox məlumat əldə etmək məqsədilə Zaqatala rayonu Üçüncü Tala kəndinə yollandıq. Şəhid haqqında məlumat toplamaq üçün kənd camaatı ilə xeyli söhbətləşdik. Əldə etdiyimiz bəzi məlumatları olduğu kimi oxucularımıza da, çatdırırıq: Şabanov Arif Nəsrullah oğlu 1970-ci il yanvarın 30-da anadan olub. 1977-ci il Tala 3 saylı məktəbə gedib. 1985-ci ildə 8 illik məktəbi bitirib. 1988-ci ildə hərbi xidmətə Krosnayarsk şəhərində xidmət edib. 1990-cı ildə vətənə geri qayıdıb.
1993-cü ilin yanvar ayında hərbi çağırışla Qarabağa gedib.
Aprelin 29-da Ağdərədə gedən ağır döyüşlər zamanı şəhid olub. Mayın 11-də Aşağı Tala qəbristanlığında dəfn olunub.
Arif əvvəlcə peşə məktəbinə daxil olub, sonra rayonda sürücülük məktəbini bitirib. Qarabağda xidmətə başladıqdan bir ay sonra yaralanıb və evə gəlib. Qolundan yaralanıb, sağalmamış da, geri qayıdıb.
Ailədə 8 uşaq olublar 3 oğlan 5 qız Arif ortancıl olub. Şəhidin adı əbədiləşdirilib və onun adı yaşadığı küçəyə verilib.
Atası Nəsrullah və anası Məhruzə də, rəhmətə gedib.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Arif Şabanovun da,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.