ŞƏHİD AYDIN HÜSEYNOVUN RUHU ŞADDIR, ÇÜNKİ VƏTƏN MÜHARİBƏSİNDƏ ONUN DA, QİSASI ALINDI.
Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala rayonu Yengiyan kənd sakini Hüseynov Aydın Şəmobil oğludur.
Şəhidimiz haqqında daha çox məlumat əldə etmək məqsədilə Zaqatala rayonu Yengiyan kəndinə yollandıq. Şəhidin kiçik qardaşı Nurəddin Hüseynovla ötən günləri xatırlayaraq, xeyli söhbətləşdik: qardaşım Hüseynov Aydın Şəmobil oğlu 1974-cü il aprelin 11-də Zaqatala rayonu Yengiyan kəndində anadan olub. 1980-1991-ci illərdəYengiyan kənd orta məktəbində təhsil alıb. 1992-ci il dekabrın 22-də çağırışla həqiqi hərbi xidmətə gedib.
1993-cü il fevralın 19-da Ağdərə Sərsəng su anbarı ətrafında gedən döyüşlərdə itgin düşüb.
Ailədə 4 uşaq olmuşuq, 3 oğlan 1 qız . Aydın evin böyük oğlu olub.
Ailəmiz ziyalı ailəsi olub. Ata -anam müəllim olub.
Qardaşım yaxşı qarmon ifa edirdi. O, həmişə məktəbin tədbirlərində fəal iştirak edib. Cox tərbiyəli , sayılıb-seçilən uşaq olub.
Müharibədə yaxşı atıcı olub. Qardaşım məndən iki yaş böyük olub, məni heç yerə aparmırdı, deyirdi ki, sən balacasan evə get.
Valdeyinləri miz onu çox axtardılar, ancaq tapa bilmədilər. Atam Şamobil və anam Rubeydə oğul dərdini çəkə bilmədilər, hər ikisi rəhmətə gediblər.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Aydın Hüseynovun da,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.