ZAQATALA RAYON KİTABXANA İŞÇİLƏRİ ŞƏHİD AİLƏLƏRİLƏ GÖRÜŞ KEÇİRİİB.

Zaqatala rayon MKS-nin Mərkəzi kitabxanası, Fındıqlı, Paşan, Muxax, Meşleş, 2 və 3 saylı Yuxarı Tala kənd, 1 və 2 saylı Aşağı Tala kənd kitabxana filiallarının birgə təşkilatçılığı ilə "26 iyun Azərbaycan Silahlı Qüvvələr" günü münasibəti ilə şəhid anaları və qazilərlə görüş təşkil edilib.

Görüşdə 1-ci Qarabağ müharibəsi şəhidlərindən Zəfər Murtuzəliyevin anası Əzizə Murtuzəliyeva, şəhid Ələsgər Şabanovun bacısı Xədicə Əliyeva, eləcə də 1-ciQarabağ müharibəsində itkin düşmüş qəhrəman oğullarımızdan Afər Mütəllibovun anası Fatma Mütəllibova, İsmayıl Müslümovun anası İsmiana Müslümova, o cümlədən Aprel döyüşlərində şəhid olmuş Rəvan Nurayevin anası Havva Nurayeva , erməni təxribatları nəticəsində həlak olmuş Turan Əsgərovun anası Lalə Əsgərova, şəhid Vahid Ərəblinskinin anası Havva Ərəblinski və 44 günlük Vətən müharibəsində şəhid olmuş Vidadi Məmmədovun anası Züleyxa Məmmədova, qazilər-Sübhan Durmuşov, Yılmaz Nəsibli, ehtiyatda olan əsgər Cəlil Əyyubov və çavuş Ramazan Əsgərov,rayon ziyalısı Gülniyar Məmmədova, kitabxana əməkdaşları iştirak ediblər.

Tədbir ilk öncə vətənimizin ərazi bütövlüyü uğrunda həlak olmuş şəhidlərimizin bir dəqiqəlik sükutla yad edilməsi ilə başlanıb. Tədbiri açıq elan edən kitabxana əməkdaşı Xədicə Şabanova tədbir iştirkaçılarını salamlayaraq "26 iyun Silhalı Qüvvələr Günü" və qarşıdan gələn "Qurban" bayramı münasibəti ilə hər kəsi təbrik etdi. Qeyd etdi ki, 26 iyun Ümummilli lider Heydər Əliyevin 22 may 1998-ci ildə imzaladığı Fərmanla "Silahlı Qüvvələrin Yaranması" Günü kimi hər il təntənə ilə qeyd edilir. Bu gün bizim həm də qürur günümüzdür çünki, Ali baş komandan İlham Əliyevin rəhbərliyi ilə ordumuz 44 günlük "Vətən Müharibəsi" ilə bütün dünyaya gücümüzü sübut etdi.

Görüşdə çıxış edən Gülniyar Məmmədova 44 günlük Vətən müharibəsində qəhrəmancasına vuruşmuş Zaqatala igidlərinin döyüş yolu barədə məlumat vermiş, 30 ildən bəri erməni vandallarının tapdağı altında qalan torpaqlarımızın azadlığı uğrunda mübarizənin ön cəbhəsində tarix yazan həmyerlilərimizin şücaətindən söz açmışdır. Şəhid Zəfər Murtuzəliyevin anası Əzizə xanım bütün şəhid analarının fikrini ifadə edərək deyib ki, bizim tərbiyə etdiyimiz gənclər erməniyə layiqli cavab verməklə yanaşı, bütün dünyaya sübut etdi ki, yurd sevgisi bütün sevgilərdən üstündür, bu sevginin əvəzi bu gün minlərlə körpənin gülüşündə yaşayır, anaların xeyir-duasında, ataların alqışında, minnətdarlığında hər gün təkrarlanır.

Digər natiqlər də bildiriblər ki, bizim müzəffər silahlı qüvvələrimiz hər zaman düşmənə layiqli cavab verməyə qadir olduqlarını lazım gələn anda sübut etməyə hazırdır.

Əlmaniz Ələkbərli
Diaspor.info
Zaqatala