HEYDƏR ƏLİYEVİN YÜZ İLLİYİ MÜNASİBƏTİLƏ ZAQATALA MƏKTƏBLİLƏRİ ARASINDA YARIŞ KEÇİRİLİB.
VƏTƏN MÜHARİBƏSİ QƏHRƏMANI İSMAYIL SƏMƏDOVUN ADINI DAŞIYAN ZAQATALA ŞƏHƏR BEŞ SAYLI TAM ORTA MƏKTƏBİN TƏŞKİLATÇILIĞI İLƏ ZAQATALA HEYDƏR ƏLİYEV MƏRKƏZİNDƏ TƏDBİR KEÇİRİLİB.
5 dekabr 2023-cü ildə Zaqatala rayon Heydər Əliyev Mərkəzində Zaqatala şəhər Vətən Müharibəsi Qəhrəmanı Şəhid İ.Səmədov adına 5 nömrəli tam orta məktəbin təşkilatçılığı ilə "Milli-mənəvi dəyərlərimizin davamçısı- Heydər Əliyev 100" adlı şəhər məktəbliləri arasında tamaşa yarışı keçirilib. Tədbirdə bir çox idarə və təşkilatların əməkdaşları, müəllimlər, valideynlər və şagirdlər iştirak ediblər.
Şəki-Zaqatala Regional Təhsil İdarəsinin Təhsilin keyfiyyəti sektorunun müdiri Bəhruz Nəbili, Şəki-Zaqatala Regional Təhsil İdarəsinin Təhsilin keyfiyyəti sektorunun məsləhətçisi Səbuhi müəllim, Zaqatala rayon Təhsil Sektorunun müdiri Kəmalə Əhmədova, Heydər Əliyev Mərkəzinin direktoru Famil Rəhimov münsiflər heyəti seçiliblər.
Tədbir Azərbaycan Respublikasının Dövlət himninin səsləndirilməsi ilə başlayıb. Ümummilli Lider Heydər Əliyev və torpaqlarımızın azadlığı uğrunda canından keçmiş şəhidlərimiz bir dəqiqəlik sükutla yad edilib. Daha sonra Vətən Müharibəsi Qəhrəmanı Şəhid kapitan İ.Səmədovun portreti səhnəyə gətirilib. Bundan sonra İ.Səmədov adına 5 nömrəli tam orta məktəbin direktoru Xanım Hacıyeva tədbiri açıq elan edib. Direktor iştirakçı şagirdlərə və məktəblərə uğurlar arzulayıb.
İlk olaraq səhnəyə Vətən Müharibəsi Qəhrəmanı İ.Səmədov adına 5 nömrəli tam orta məktəbin şagirdləri dəvət olunub. S.Vurğunun "Vaqif" dramında "Vaqif və Qacarın qarşılaşması" səhnəsi göstərilib.
2-ci olaraq səhnəyə Zərifə Əliyeva adına Texniki fənlər təmayüllü Liseyin şagirdləri dəvət ediliblər. Onlar isə S.Vurğunun "Vaqif" dramında "Qacarın ölüm səhnəsi" göstəriblər.
Sonra İ.Səmədov adına 5 nömrəli tam orta məktəbin şagirdləri "Vətən oğlu" mahnısını ifa ediblər.
Səhnə Zaqatala şəhər Şəhid Z.Murtuzəliyev adına bir nömrəli tam orta məktəbin şagirdlərinə verilib. Varis Yolçuyevin "Bir ovuc torpaq" əsərindən bir hissəsi səhnələşdirilib.
Bundan sonra şəhər 5 nömrəli tam orta məktəbin şagirdləri maraqlı rəqs kompazisiyası ilə çıxış ediblər.
Sonra səhnə Zaqatala şəhər Ş.Qurbanov adına 3 nömrəli tam orta məktəbin şagirdlərinə verilib. C. Məmmədquluzadənin "Ölülər" tragikomediyası səhnələşdirilib.
Son olaraq səhnəyə Vətən Müharibəsi Qəhrəmanı Ş.Qaflanov adına Humanitar Fənlər Gimnaziyasının şagirdi dəvət olunub. "Xilaskarımız Heydər Əliyevlə Manqurtluqdan Qurtuluşa" adlı çıxış göstərilib.
Vətən Müharibəsi Qəhrəmanı İ.Səmədov adına 5 nömrəli tam orta məktəbin müəllim və şagird kollektivi "Qarabağ" mahnısını ifa ediblər.
Bununla da çıxışlar yekunlaşıb, qaliblər Şəki-Zaqatala Regional Təhsil İdarəsinin təhsilin keyfiyyəti sektorunun müdiri Bəhruz Nəbili tərəfindən elan olunub.
1-ci yerə Ş.Qurbanov adına 3 nömrəli tam orta məktəb, 2-ci yerə Akademik Zərifə Əliyeva adına Texniki fənlər təmayüllü Lisey, 3-cü yerə isə Vətən Müharibəsi Qəhrəmanı İ.Səmədov adına 5 nömrəli tam orta məktəbin şagirdləri layiq görülüblər. Qalib məktəblərin şagirdlərinə diplom və müxtəlif hədiyyələr təqdim edilib.
Tədbirin ərsəyə gəlməsində əməyi olan İ.Səmədov adına 5 nömrəli tam orta məktəbin Azərbaycan dili və ədəbiyyat müəllimi Mərziyyə Qurbanovaya təşəkkürnamə verilib.
Diaspor.info
Zaqatala bürosu
