GÜCLÜ LİDER, PEŞƏKAR RƏHBƏR QAZANILAN UĞURLARIN VƏ QƏLƏBƏNİN YARISI DEMƏKDİR.
Azərbaycan Yazıçılar Birliyi Şimal-qərb regional bölməsinin sədri Əlmaniz Ələkbərli 1998-ci ildən qəzet jurnalisti kimi Zaqatalaya gəlib. İşlədiyi müddət ərzində rayonda və bölgədə olan ciddi problemlərimizi işıqlandıraraq onların həllinə nail olub, odur ki, daha çox sadə insanların sevimlisinə çevrilib.
Əlmaniz Ələkbərli jurnalist kimi Azərbaycanda bir çox sahələrdə Müdafiə nazirliyi və Ombudsman aparatının keçirdiyi jurnalist yazıları müsabiqəsinin üç dəfə qalibi olub.(2--3-3-yerlər)
2023-cü il iyulun 25-də Zaqatala RİH başçısı Mübariz Əhmədzadə cənablarının Azərbaycan Yazıçılar Birliyinə ünvanladığı məktuba cavab olaraq Azərbaycan Yazıçılar Birliyi Şimal-qərb regional bölməsi yaradılıb. Azərbaycan Yazıçılar Birliyinin Şimal Qərb Regional Bölməsinin sədri vəzifəsinə Yazıçı -jurnalist Əlmaniz Ələkbərli seçilib.
Əlmaniz Ələkbərlinin sədr kimi təqdimatı və vəsiqəsinin təqdim olunması üçün Zaqatala Heydər Əliyev mərkəzində tədbir keçirilib. Tədbirdə Zaqatala RİH başçısı Mübariz Əhmədzadə, rayon ziyalıları və ictimaiyyətinin nümayəndələri də iştirak ediblər.
Azərbaycan Yazıçılar Birliyinin katibi yazıçı, dramaturq, şair İlqar Fəhmi Sədr vəsiqəsini Əlmaniz Ələkbərliyə təqdim edərək bu sahədə aktiv işlər görüləcəyinə ümid etdiyini bildirib.
Bəli mən müəllim və şair kimi, həm də bir Şəhid anası kimi tam əminliklə deyə bilərəm ki, Əlmaniz Ələkbərli ona bəslənən ümidləri doğruldub.
Belə ki, qısa bir müddət ərzində Əlmaniz Ələkbərli bizi bir yerə toplayıb iclas keçirdi. Və biz həmin iclasdan sonra daha çox ruhlandıq. Daha sonra Sədrimiz şair və yazıçıların yaradıcılıq gecələrini keçirməyə başladı. Bundan əlavə səhhətində problem olan yaşlı həmkarlarımızı ziyarət etməyə başladıq. Ad günlərinin təmtəraqlı şəkildə qeyd olunmasına nail olundu. Biz şair və yazıçıların yazdıqlarının bir hissəsini özündə əks etdirən "Zaqatala Almanaxı" kitabı da məhz sədrimizin şəxsi vəsaiti hesabına işıq üzü görüb. Hazırda bu ənənəni davam etdirir və "Qax-Balakən" Almanaxı artıq çapdan çıxmaq üzrədir.
Mən özümə borc bildim ki, bütün Zaqatala Şəhidlərini özündə əks etdirən "Şanlı Tarix Yazanlar" kitabının müəllifi Əlmaniz Ələkbərliyə Zaqatala yazarları adından minnətdarlıq edim. Əlmaniz Ələkbərli Zaqataladan olan bir neçə Şəhid haqqında kitab da yazıb və hazırda yenə də yazır. Şəhid Orxan Cumayevin haqqında yazılan "Dastana Dönən Şərəfli Ömür Yolu" kitabı oxuculara təqdim olunub. Hazırda xüsusi təyinatlı Şəhid Əhməd Laçınovun haqqında yazılacaq kitab üzərində işləyir. Bundan əlavə Ə. Ələkbərli "Kəngərli Şəhidləri" kitabının da müəllifidir. Ümumiyyətlə isə hazırda on kitab müəllifi olan sədrimiz işləməkdən yorulmur, əksinə bundan zövq alır. 
Əlmaniz Ələkbərli Azərbaycan Yazıçılar Birliyi Şimal-Qərb Regional Bölməsinin sədri seçildiyi gündən bu günə qədər apardığı aktiv fəaliyyətin nəticəsidir ki, qələmini yerə qoyaraq bir daha şeir yazmayacağam deyən onlarla şair əllərinə qələm götürərək yenidən yazıb yaratmağa başladılar. Yazdığı şeirlərini gizlədən sandıq ədəbiyyatı dediyimiz onlarla şair tədbirlərimizə qoşularaq daha açıq formada yazıb yaratmağa başladılar. Bütün bu uğurların arxasında liderimiz Əlmaniz Ələkbərli dayanır. Odur ki, Zaqatala yazarları adından ona can sağlığı və yaradıcılıq uğurları arzulayıram.
Züleyxa Davudova
Şəhid anası, Azərbaycan Yazıçılar Birliyi Şimal Qərb Regional Bölməsinin üzvü.
