Prezident peyvənd olundu Tokayev özünü yaxşı hiss edir
"Qazaxıstan Prezidenti Kassum-Jomart Tokayev koronavirusa qarşı peyvənd olunub və özünü yaxşı hiss edir". DİASPOR.İNFO xəbər verir ki, bu barədə çərşənbə axşamı dövlət başçısının mətbuat katibi Berik Uali öz Facebook səhifəsində yazıb.
"Bu gün dövlət başçısına Karaqanda əczaçılıq zavodunun istehsal etdiyi "Sputnik V" peyvəndi vurulub. Peyvənddən sonra prezident özünü yaxşı hiss edir və yan təsirlər müşahidə edilməyib", deyə Uali öz sosial şəbəkə hesabında yazıb.
Ualinin sözlərinə görə, prezident əmindir ki, yalnız Qazaxıstan vətəndaşlarının peyvənd olunması və kollektiv toxunulmazlığın formalaşması koronavirusun məğlub olmasını, bütün məhdudiyyətlərin aradan qaldırılmasını və vətəndaşların adi həyatının və iqtisadi fəaliyyətinin bərpasını təmin edəcəkdir.
"Dövlət başçısı yenidən bütün vətəndaşları peyvəndi mümkün qədər tez qəbul etməyə çağırır. Bu, özünüzü və yaxınlarınızı qorumağın yeganə yoludur. Bundan əvvəl prezident hökumətə və yerli icra orqanlarına peyvənd tədarükünü təmin etməyi tapşırmışdı", deyə prezidentin mətbuat katibi Berik Uali əlavə edib.
