İran rəhbərliyi ictimai yerlərdə və küçələrdə hicaba nəzarət etmək üçün videokameralar quraşdırmağa başlayıb.
Diaspor.info xəbər verir ki, bu barədə “Reuters” ölkənin Daxili İşlər Nazirliyinin bəyanatına istinadən məlumat yayıb.
Qurum qeyd edib ki, bu tədbir “hicab qanununa qarşı müqaviməti qabaqlamaq” məqsədi daşıyır. Polis hicabsız gəzən və ya səhv taxan qadınları müəyyənləşdirəcək. Müəyyən edildikdən sonra pozucular “fəsadlar barədə xəbərdarlıq edən mətn mesajları” alacaqlar.
Xatırladaq ki, ötən il sentyabrın 14-də Məhsa Əmini yanlış taxılmış hicaba görə əxlaq polisi tərəfindən saxlanılıb. Dindirildikdən sonra o, xəstəxanaya aparılıb və orada komaya düşüb. Sentyabrın 16-da Əmini 22 yaşında vəfat edib. Rəsmilər qızın ölüm səbəbinin infarkt olduğunu bildirib. Lakin onun yaxınları dindirmə zamanı onun vəhşicəsinə döyüldüyünü iddia edir.
Hadisədən sonra İranı genişmiqyaslı etirazlar bürüyüb. İğtişaşlar zamanı ölkənin Daxili İşlər Nazirliyinin məlumatına görə, 200 nəfər həlak olub. Müstəqil QHT-lərin məlumatına görə, ölənlərin sayı 500-dən çoxdur. Dekabrın 4-də İran rəhbərliyi əxlaq polisini ləğv edib.
Qeyd edək ki, 1979-cu il İslam İnqilabı dini qanunların sərt təfsirini tətbiq edəndən bəri qadınlar qanunla saçlarını hicab ilə örtməlidirlər. Qanunu pozan qadınları cərimə və ya həbs gözləyir.
