Ombudsman Səbinə Əliyeva V “Yüksəliş” müsabiqəsinin yarımfinal mərhələsində iştirak edib
Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva V “Yüksəliş” müsabiqəsinin yarımfinal mərhələsində iştirak edib.
Tədbirdə çıxışı zamanı Ombudsman ölkəmizdə artan rəqabətə uyğun insan kapitalının formalaşdırılmasını və inkişafını prioritet məqsədlərdən biri kimi müəyyənləşdirildiyini bildirib, Azərbaycan Respublikası Prezidentinin müvafiq Sərəncamı ilə təsis olunan “Yüksəliş” müsabiqəsinin strateji idarəçilik mədəniyyətinin formalaşmasına və bacarıqlı kadrların dövlətin inkişafında iştirak etməsinə geniş imkanlar yaratdığını qeyd edib.
Müvəkkil Azərbaycanda insan kapitalının hərtərəfli inkişafı sahəsində dövlət proqramları, strategiyalar və fəaliyyət planlarının qəbul olunduğunu və davamlı islahatların aparıldığını diqqətə çatdırıb. Qeyd olunub ki, Azərbaycan Respublikasının Konstitusiyasında insan hüquq və azadlıqlarının təmin edilməsinin dövlətin ali məqsədi kimi təsbit olunması, habelə bu ali məqsədin həyata keçirilməsi sahəsində konstitusion statusa malik Ombudsman təsisatının yaradılması ölkəmizdə insan hüquqlarına verilən ən yüksək dəyərin təzahürüdür.
İnsan və vətəndaş hüquq və azadlıqlarının müdafiəsi istiqamətində həyata keçirdiyi fəaliyyəti barədə məlumat verən Ombudsman beynəlxalq təcrübələrdən irəli gələrək mandatının genişləndiyini, dövlət qurumları, vətəndaş cəmiyyəti institutları və beynəlxalq təşkilatlarla əməkdaşlığın gücləndirildiyini bildirib.
Hüquq düşüncəsinin və hüquq mədəniyyətinin inkişaf etdirilməsi, əhalinin müxtəlif qruplarının hüquqlarının təbliği sahəsində fəaliyyəti barədə danışan Müvəkkil hər il ölkəmizdə insan hüquqları və uşaq hüquqları aylıqlarının elan olunduğunu, aktual mövzuları əhatə edən çoxsaylı hüquqi maarifləndirmə tədbirlərinin həyata keçirildiyini qeyd edib.
Ombudsman mentoru olduğu “Yüksəliş” müsabiqəsi qalibləri ilə mütəmadi görüşlərin keçirildiyini, həmin şəxslərin təsisatın fəaliyyətinə cəlb olunmalarının onların idarəetmə bacarıqlarının real hüquqi və institusional mühitdə inkişaf etdirilməsinə, həmçinin həssas əhali qruplarının hüquqlarının müdafiəsi sahəsində praktiki təşəbbüslərdə iştirak etmələrinə əlverişli imkan yaratdığını diqqətə çatdırıb.
Yekunda Ombudsman Səbinə Əliyeva “Yüksəliş” müsabiqəsinin iştirakçılarına uğurlar arzulayıb.
