Qərbi Afrika Ölkələrinin İqtisadi Birliyinin (ECOWAS) nümayəndələri Nigerdəki üsyançılara ultimatum təqdim edərək, onları avqustun 6-dək devrilmiş Prezident Məhəmməd Bazuma hakimiyyəti qaytarmağa çağırıblar.
Diaspor info xəbər verir ki, bu barədə "Reuters" məlumat yayıb.Bildirilib ki, Qərbi Afrikanın müdafiə rəisləri Nigerdəki çevriliş bazar gününə qədər ləğv edilmədiyi təqdirdə hərbi əməliyyat planını həyata keçirəcəklər.Qeyd edək ki, 15 ölkədən ibarət ECOWAS Nigerə qarşı sanksiyalar tətbiq edib. Bir gün əvvəl Qərbi Afrika ölkələri icmasının nümayəndələrindən ibarət nümayəndə heyəti danışıqlar aparmaq üçün Nigerin paytaxtı Niameyə gəlsə də, üsyançılar bundan imtina ediblər. Bundan əvvəl Nigerin devrilmiş Prezidenti Məhəmməd Bazum ABŞ və dünya ictimaiyyətini ölkədə konstitusiya quruluşunu bərpa etməyə çağırıb.ABŞ, Çin, Avropa və Rusiya üçün Niger uran və neftlə zəngin Sahel bölgəsində islamçı üsyançılarla müharibədə strateji əhəmiyyətə malikdir. Birləşmiş Ştatlar Hökuməti Nigerə fayda verən bəzi xarici yardım proqramlarını dayandırsa da, humanitar və ərzaq yardımı göstərməyə davam edir.
Xatırladaq ki, Nigerdə üsyan iyulun 26-da başlayıb, hərbçilər ölkədə komendant saatı tətbiq edərək konstitusiyanın fəaliyyətini dayandırıblar. Onlar, həmçinin partiyaların siyasi işini qadağan ediblər. Hərbçilər Vətənin Müdafiəsi üzrə Milli Şuranın yaradıldığını elan ediblər və iyulun 28-də general Abdurahman Çiani Nigerin yeni lideri elan olunub.
