ABŞ dövlət katibi Antoni Blinken İsrailə 147,5 milyon dollar dəyərində 155 millimetrlik mərmi satışını təsdiqləyib.
Diaspor info-nun məlumatına görə, bu barədə Pentaqonun hökumətlərarası müqavilələr əsasında xaricə hərbi texnika və silahların tədarükünə cavabdeh olan Təhlükəsizlik Əməkdaşlıq Agentliyi məlumat yayıb.
Sənədə əsasən söhbət 155 mm çaplı M107 yüksək partlayıcı parçalanma mərmilərinin və müvafiq avadanlıqların tədarükündən gedir.
“Dövlət katibi ABŞ-ın milli təhlükəsizliyinin maraqları naminə siyahıya alınmış hərbi təyinatlı malların və xidmətlərin İsrail hökumətinə dərhal satılmasını tələb edən fövqəladə halların mövcud olması ilə bağlı qənaətə gəlib və ətraflı təsdiqini Konqresə təqdim edib”, - bəyanatda deyilir.
"Birləşmiş Ştatlar İsrailin təhlükəsizliyinə sadiqdir, bu ölkənin özünümüdafiə imkanlarının inkişafı və saxlanmasına yardım ABŞ-ın əsas milli maraqlarına cavab verir", - Pentaqondan bildirilib. Qeyd edilir ki, yəhudi dövlətinə mərmi satışı “regionda əsas hərbi balansı dəyişməyəcək”. Mərmilər ABŞ ehtiyatlarından İsrailə veriləcək, çünki Pentaqon bunun ABŞ silahlı qüvvələrinin "döyüş hazırlığına təsir etməyəcəyini" hesab edir.
Xatırladaq ki, oktyabrın 7-də Qəzza zolağından HƏMAS yaraqlılarının İsrail ərazisinə soxulmasından sonra Yaxın Şərqdə vəziyyət kəskin şəkildə pisləşib, bu, sərhədyanı qəsəbələrin sakinlərinin öldürülməsi və uşaqlar, qadınlar və qocalar da daxil olmaqla 200-dən çox girov götürülməsi ilə müşayiət olunub.
İsrail tərəfi buna cavab olaraq bu günə qədər davam edən “Dəmir qılınclar” əməliyyatının başlandığını elan edib.
