Bosniya və Herseqovinanın Nazirlər Şurasının sədri Borjana Kristo Avropa İttifaqı (Aİ) ilə üzvlük danışıqlarının mart ayında başlayacağına ümid etdiyini bildirib.
Diaspor info China.org saytına istinadla xəbər verir ki, Borjana Kristo bu barədə fikrini Brüsseldə Aİ-nin Ümumi İşlər Şurasının üzvləri ilə görüşündə səsləndirib.
“Əminəm ki, Aİ ilk növbədə bizim nəticələrimizi, sərf etdiyimiz səyləri və irəliləyişimizi nəzərə alaraq, mart ayında danışıqlara başlayacaq”,- deyə o bildirib.
Borjana Kristo 2023-cü ildə əldə olunan irəliləyişin 2024-cü ildə də sürətli templə davam etdiyini və Nazirlər Şurasının 14 əsas prioritetin yerinə yetirilməsi istiqamətində mühüm addımlar atdığını vurğulayıb.
Bosniya və Hersoqovinanın xarici və təhlükəsizlik siyasətinin ilk dəfə olaraq Aİ-nin siyasəti ilə tam üst-üstə düşdüyünü diqqətə çatdıran Kristo, həmçinin seçki qanunvericiliyinə dəyişikliklərin və bu prosesin şəffaflığına yönəlmiş hərtərəfli islahatların xüsusi əhəmiyyətini qeyd edib.
Xatırladaq ki, Aİ 2022-ci ilin dekabrında Balkan ölkəsinə namizəd statusu verib və bundan bir il sonra “üzvlük meyarlarına lazımi uyğunluq dərəcəsi əldə edildikdən” sonra üzvlük danışıqlarına başlayacağı ilə bağlı qərar qəbul edib.
