Anqolanın Luanda şəhərində Novruz bayramı ilə bağlı tədbir keçirilib
Anqolanın Luanda şəhərində Novruz bayramı ilə bağlı tədbir keçirilib.
Nigeriyada təsis edilmiş “Azərbaycanın Dostları Təşkilatı”nın təşkilatçılığı və dəstəyi ilə baş tutan tədbirdə Anqolanın Camunga Simfonik Orkestri məktəbinin ifaçıları, şagirdləri və müəllim heyəti iştirak ediblər. Tədbirə həmçinin 2023-cü ilin yanvar ayından Afrika ölkələrində səyahət edən mərakeşli velosipedçi Meryem Belkhiel də qatılıb.
“Azərbaycanın Dostları Təşkilatı”nın təsisçisi və prezidenti, hazırda Anqolada yaşayan Billurə Bayramova Bernard tədbir iştirakçılarına Novruz bayramı barədə məlumat verib.
UNESCO-nun “Bəşəriyyətin Qeyri-Maddi Mədəni İrs üzrə Reprezentativ siyahısı”na daxil edilmiş Azərbaycan tarı 2023-cü ilin sentyabr ayında Camunga orkestri ilə baş tutan “Tarın Səsi” layihəsinin davamı kimi, Novruz bayramı münasibətilə musiqi məktəbinin direktoruna hədiyyə olunub. Eyni zamanda Novruz bayramının simvolu olan səməni, milli paxlavamız, milli geyimlərimizlə bağlı məlumatlar məktəb tələbələri və müəllimləri ilə paylaşılıb.
Novruz bayramının yaz fəslinin gəlişi, torpağın oyanışı və təbiətin canlanması olması nəzərə alınaraq iştirakçılar tərəfindən tədbir zamanı Anqolanın simvolu Baobab ağacı dostluq rəmzi kimi əkilib.