Türkiyədəki fəlakət bölgəsinə ilk xilasetmə qrupları 2023-cü ilin fevral ayında Azərbaycandan gəlib. Qardaş ölkənin dəstəyi ilə Kahramanmaraşda “Azərbaycan” adlı iri yaşayış kompleksi layihəsi həyata keçirilir. Faciədən sonra göstərdikləri həmrəyliyə və köməyə görə qardaş ölkənin rəhbərliyinə və bütün Azərbaycan xalqına xüsusi minnətdarlığımı bildirmək istəyirəm.
Diaspor.info xəbər verir ki, bu sözləri Türkiyə Fəlakətlərin İdarə Olunması İdarəsinin (AFAD) Zəlzələ Riski və İdarəetmə Departamentinin rəhbəri Orhan Tatar Kahramanmaraş şəhərində jurnalistlərlə görüşdə deyib.
Onun sözlərinə görə, Türkiyədə 2023-cü ilin fevralında baş vermiş zəlzələlər məhvetmə gücünə görə 2000 atom bombası ilə müqayisə oluna bilərdi və irimiqyaslı fəlakətin nəticələri 14 milyon insanın yaşadığı 120 min kvadratkilometr sahədə hiss olunub.
AFAD nümayəndəsi əlavə edib: “2023-cü il fevralın 6-da baş verən dağıdıcı zəlzələlərdən sonra 67 669 afterşok qeydə alınıb. Türkiyənin 124 şəhəri və 6 929 kəndi əhatə edən 11 vilayəti fəlakət zonası elan edilib. Onlarla məskunlaşmış ərazidə irimiqyaslı dağıntılar qeydə alınıb, 53 737 nəfər ölüb, 107 213 nəfər yaralanıb. Türkiyənin 18 vilayətində 2,3 milyondan çox binaya ziyan dəyib, onlardan 39 min 546-sı tamamilə dağılıb, 21 mindən çoxu yararsız hala düşüb. Bundan başqa, 206 mindən çox binaya ciddi ziyan dəydiyi məlum olub”.
Orhan Tatar qeyd edib ki, xilasetmə işlərinə 35 250 mütəxəssis, o cümlədən 93 ölkədən 11 488 xilasedici cəlb olunub. Fəlakət bölgəsinə yardımın çatdırılması üçün 23 dəniz gəmisi, 182 təyyarə, 141 helikopter və 150 min yük maşınından istifadə edilib.
Departament rəhbəri bildirib: “Türkiyənin 11 vilayətinin 2,5 milyon sakini tez bir zamanda çadır və konteyner şəhərlərində, eləcə də ölkənin digər yerlərində müxtəlif obyektlərdə yerləşdirilib. Fəlakət bölgəsində ümumilikdə 350 çadır və 428 konteyner şəhəri yaradılıb. Təkcə konteyner evlərində 707 min Türkiyə sakini məskunlaşıb”.
Orhan Tatar vurğulayıb ki, son iki ildə dövlət ölkənin cənubunda və cənub-şərqində baş vermiş irimiqyaslı fəlakətin nəticələrinin aradan qaldırılması üçün bütün mümkün addımları atıb.
“Dövlətdən yardım alan 444 011 mülk sahibi müəyyən edilib. Mənzilsiz qalan insanların çoxu artıq mənzillə təmin olunub”, - deyə AFAD nümayəndəsi sözlərinə yekun vurub.
