İtaliya bütün tərəfləri ABŞ Prezidenti Donald Trampın Qəzza ilə bağlı təqdim etdiyi planı qəbul etməyə çağırır.
Diaspor.info xəbər verir ki, bu barədə İtaliya Nazirlər Şurasının yaydığı məlumatda deyilir.
İtaliya hökumətinin uzun müddətdir ki, Qəzzada müharibənin dayandırılması və girovların azad edilməsi üçün bütün səyləri dəstəkləməyə sadiq olduğu bildirilən məlumatda qeyd olunur: “Döyüş əməliyyatlarına son qoyulması həm də Qəzza zolağının mülki əhalisinə təsir edən dəhşətli humanitar böhranın, tamamilə əsassız və qəbuledilməz faciənin həlli üçün vacibdir. ABŞ Prezidenti Donald Trampın təqdim etdiyi plan bu prosesdə dönüş nöqtəsi ola bilər və hərbi əməliyyatların daimi dayandırılmasına, bütün girovların dərhal azad edilməsinə və mülki əhalinin tam və təhlükəsiz humanitar yardıma çıxışına imkan verə bilər. İtaliyanın alqışladığı bu plan regional tərəfdaşların tam iştirakı ilə Qəzza zolağının sabitləşdirilməsi, yenidən qurulması və inkişafı üçün iddialı təklifdir. Bu kontekstdə İtaliya ABŞ, Avropa tərəfdaşları və regionla sıx koordinasiyada öz rolunu oynamağa hazırdır və Prezident Trampa vasitəçilik və Yaxın Şərqə sülh gətirmək səylərinə görə, təşəkkür edir. İtaliya bütün tərəfləri bu fürsətdən istifadə etməyə və planı qəbul etməyə çağırır. Xüsusilə HƏMAS girovları azad etməklə, Qəzzanın gələcəyində heç bir rolu olmaması ilə razılaşmaqla və tamamilə tərksilah olmaqla müharibəni bitirmək imkanına malikdir. İtaliya rəsmi Vaşinqtonun dinc və firavan birgə yaşayışa aparan siyasi yolda razılığa gəlmək üçün İsrail və Fələstin arasında dialoqu yeniləmək səylərini dəstəkləyəcək. Yaxın Şərqdə ədalətli və davamlı sülh, İsrail və Fələstinin sülh və təhlükəsizlik şəraitində yan-yana yaşaması və İsrailin ərəb və İslam xalqları ilə tam normallaşması ilə mümkündür”, - deyə məlumatda bildirilir.
