Türkiyə terror probleminin tamamilə aradan qaldırılması ərəfəsindədir. PKK terror təşkilatının özünü buraxmaqla bağlı bəyanatı və silahların simvolik şəkildə məhv edilməsi ölkə gündəmindən terrorizm təhlükəsinin tam çıxarılacağı günü yaxınlaşdırıb.
Diaspor.info xəbər verir ki, bunu Türkiyə Prezidenti Rəcəb Tayyib Ərdoğan parlamentinin payız sessiyasının 28-ci çağırış açılışında deyib.
Dövlət başçısı xatırladıb ki, 1984-cü ildən bəri terrorizmə qarşı mübarizədə on minlərlə Türkiyə vətəndaşı həlak olub, ölkə iqtisadiyyatı 2 trilyon ABŞ dolları həcmində zərər görüb.
O, terrorizm probleminin həlli, ictimai birliyin və həmrəyliyin möhkəmləndirilməsi istiqamətində parlament komissiyasının fəaliyyətini yüksək qiymətləndirib.
Prezident vurğulayıb ki, Ankara Türkiyədə formalaşmış sakitlik mühitinin qorunması üçün bütün imkanlarını səfərbər edəcək:
“Əminəm ki, “terrorsuz Türkiyə” hədəfinə nail olmaqla ölkəmiz inkişafında yeni sıçrayış edəcək”, – deyə Ərdoğan bildirib və son bir ildə terrorizm təhlükəsinin aradan qaldırılması istiqamətində atılan addımları tarixi əhəmiyyətli adlandırıb.
Suriya ilə bağlı vəziyyətə toxunan dövlət başçısı qeyd edib ki, Türkiyə qonşu ölkədə “deja vü ssenarisi”nin həyata keçirilməsinə imkan verməyəcək.
“Ankara böhranın əvvəlindən bəri Suriyanın bütövlüyünü qətiyyətlə dəstəkləyib”, – deyən Türkiyə lideri türk, kürd və ərəblərin ittifaqını regionda təhlükəsizliyin qarantı adlandırıb.
Onun sözlərinə görə, Ankara Suriyanın ərazi bütövlüyünün təmin olunması, zəruri hallarda isə Türkiyə sərhədlərindən kənarda terrorçu qurumların formalaşmasının qarşısını alınması üçün bütün diplomatik kanalları işə salıb.
