Rusiya Prezidenti Vladimir Putin hələ də Ukraynanın Donetsk və Luqansk vilayətlərinin ona “verilməsini” istəyir. Amma ABŞ Prezidenti Donald Tramp bu məsələdə təzyiq göstərmir.
Diaspor.info xəbər verir ki, bu sözləri Ukrayna Prezidenti Volodimir Zelenski jurnalistlərlə görüşündə deyib.
Zelenski qeyd edib ki, “Ukraynanın mövqeyi möhkəm olaraq qalır – təcavüzkara heç bir ərazi hədiyyə edilməyəcək”. Dövlət başçısının sözlərinə görə, o, bunu həm Trampa, həm də onun xüsusi nümayəndəsi Stiv Uitkoffa izah edib.
“Biz başa düşürük ki, cənab Uitkoff sadəcə olaraq Rusiyanın fikrində olanı çatdırır. Bu, onun öz fikri olduğu anlamına gəlmir. Ən azından, o, belə deyir”, - deyən Zelenski əlavə edib ki, o, Uitkoffa Donbasdakı insanların psevdoreferendumlar vasitəsilə Rusiyaya qoşulmaq istəməsi ilə bağlı aldadıcı təəssürat barədə də danışıb.
“Amma bu məsələdə bir nüans var. Əvvəlcə işğal gəldi, sonra nəzarətsiz və “referendum” adlandırılan açıq-aşkar qanunsuz bir şey oldu. Üstəlik, işğalın başlaması ilə qondarma “referendum” arasında 10 il var”, - deyə Ukrayna lideri izah edib.
O, həmçinin Rusiyanın Ukraynanın vilayətlərini öz Konstitusiyasına daxil etməsi ilə bağlı Uittkoffla ciddi söhbətin olduğundan danışıb.
“Əgər Putin sabah, müharibə başa çatdıqdan sonra başqa bir tələb irəli sürsə, biz yenə hər hansı ərazidən çəkilməli olacağıqmı? Mən məsələn, Rusiya Federasiyasının iki bölgəsini Ukrayna Konstitusiyasına əlavə etsəm, onlar bu ərazilərdən çıxacaqlarmı? Bu, işlək olmayan modeldir”, -deyə Zelenski bildirib.
Ukrayna Prezidentinin sözlərinə görə, oktyabrın 17-də keçirilən görüş zamanı o, Rusiya tərəfinin məhz nə istədiyini anlamaq istəyib, lakin hələ ki, dəqiq mövqe yoxdur.
“Bu, hələ ki, səsləndirilməyib”, - deyə Zelenski Trampla ərazi, ordu, dil və sair məsələlərlə bağlı Rusiyanın şərtlərini müzakirə etməsi ilə əlaqədar suala cavab verib.
Bununla belə, Ukrayna Prezidenti hesab edir ki, Kiyev zəif ərazi həlli ilə razılaşdıqdan sonra Tramp və Putin öz aralarında başqa məsələləri həll etməyə çalışacaqlar.
O, buna misal olaraq, Ağ Evdə atəşkəslə bağlı müzakirə zamanı ona Rusiya təbliğatının cəfəngiyatını - Ukraynanın yeni hücuma hazırlaşması və buna görə də fasilə verilə bilməyəcəyi iddiasını göstərib.
“Mən deyirəm: Başa düşmürəm ki, əgər müharibəyə real son qoyularsa, sizinlə imzaladığımız təhlükəsizlik zəmanətlərini necə poza bilərik?”, - deyə Zelenski qeyd edib.
O, həmçinin Cənubi və Şimali Koreyanı, xüsusən də ABŞ-dan təhlükəsizlik zəmanəti ilə birincinin necə “mütərəqqi ölkəyə” çevrildiyini, ikincinin isə totalitarizm üçün zəmin olduğunu xatırladıb. Bu arada, hərbi əməliyyatların başa çatmasından 70 ildən çox keçməsinə baxmayaraq, hələ də onların arasında yekun sülh sazişi yoxdur.
Bundan əvvəl, oktyabrın 19-da mediada Trampın Zelenskidən Putinin şərtləri ilə razılaşmasını tələb etdiyi, əks halda onun “Ukraynanı məhv edəcəyi” iddiası ilə bağlı xəbərlər yayılmışdı.
