ŞƏHİD AFƏR MÜTƏLLİBOVUN RUHU ŞADDIR, ÇÜNKİ VƏTƏN MÜHARİBƏSİNDƏ ONUN DA, QİSASI ALINDI.
Azərbaycan yenicə müstəqilliyini əldə etmişdir ki, xain qonşuları tərəfindən təcavüzlə rastlaşdı. Həmin vaxtı, yəni “Birinci Qarabağ” müharibəsi başlayan zaman, Azərbaycan nəinki müharibəyə hazır deyildi, hətta Milli ordusu belə tam formalaşmamışdı. Düzdür xain qonşumuz olan ermənilərin də, milli ordusu yox səviyyəsində idi, ancaq Azərbaycandan fərqli olaraq onlara havadarları tərəfindən xeyli silah-sursat hədiyyə olunduğuna görə, müharibənin sonu iyirmi faiz torpaqlarımızın itirilməsi ilə yekunlaşdı. Aydın məsələdir ki, itirilmiş torpaqlarımız, xalqımızın başına gətirilən soyqırımlarla heç bir qeyrətli Azərbaycan oğulu razılaşa bilməzdi. Həmin dövrdə igid, qeyrətli oğullarımız əliyalın olsalar da, yağı düşmənin hücumundan qorxub qaçmadılar, qəhrəmancasına döyüşərək, vətən yolunda şəhid oldular. Belə igid, qəhrəman oğullarımızdan biri də, Zaqatala şəhər sakini Mütəllibov Afər Zakir oğludur.
Afər haqqında daha çox məlumat əldə etmək məqsədilə Zaqatala şəhərinə, şəhidin ailəsilə görüşə yollandıq. Şəhidin anası Fatma xanımla, xalası Zərnişan xanımla onun haqqında xeyli söhbətləşdik, ötən günləri, xatirələri yada saldıq. Şəhidimizi oxucularımızla tanış etmək üçün onun haqqında qısa arayış vermək istəyirik:
“ Mütəllibov Afər Zakir oğlu 1969-cu il aprelin 30-da Zaqatala şəhərində doğulub.
1976-1986-cı illərdə Zaqatala şəhər Şixəli Qurbanov adına 3 saylı orta məktəbdə təhsil alıb. Muğanlı kəndində yerləşən kərpiczavodda işləyib. 1987- 89-cu illərdə Əfqanıstanda hərbi xidmətdə olub.
1992-ci il fevralın 15-də könüllü olaraq, Qarabağa, cəbhəyə getdi. May ayının 8-də itgin düşdü. Ramiz Qəmbərovun batalyonunda döyüşüb.”
Afərgil ailədə iki qardaş, bir bacı olmaqla, 3 uşaq olublar.
Şəhidimizin anası Fatma xanım deyir ki, Afər elə uşaqlıqdan müharibələrlə maraqlanan idi: onun atası Zakir 10 ildir rəhmətə gedib. Afər uşaqlıqdan müharibəylə çox maraqlanırdı.
1992-ci il aprelin 13-də toya gəlmişdi. Bacısı Könulun toyu idi. Dostlarıyla gəldi 3 gün qaldı və dedi ki, mən hökmən getməliyəm. Sən bilmirsən ki, ermənilər bizim millətin başına nə oyunlar açır.
Oğlum 30 ildir ki, itgin düşüb. Bir ana üçün bundan böyük dərd yoxdur.
Mən oğlumu yuxumda da, gördüm. Yuxuda gördüm ki, oğlum Azərlə Afər dağa qalxırdılar, onları gülləylə vurdular, ancaq güllə Azərin ayağına dəydi. Sonra bir dəfə də, gördüm ki, böyük bir hərbi maşın bizim həyətə gəldi və mənə dedi ki, ana, məgər mən ölmüşəm, sən mənə yas tutursan?
Odur ki, baxmayaraq, Afərə yas mərasimi verdik, ancaq gözüm hələ də, yoldadır, oğlumun gələcəyi günü gözləyirəm.
Fatma xanımın bacısı Zərnişan xanım, yəni Afərin xalası deyirdi ki, Qax sanatoriyasında bir kişi var idi. Şuşalı idi, adı Kərim kişi idi. O deyirdi ki, mən dağ yollarıyla, dar cığırlarla gizlincə qaçırdım. Bir meyid gördüm, yaxınlaşıb baxdım ki, Azərbaycan əsgəridir. Boynunda iplə bağlanmış gülləni açıb oxudum. Orada Mütəllibov Afər yazılmışdır. Biz bu hadisəni eşitdikdən sonra dəqiq bildim ki, oğlumuz şəhid olub.
İkinci Qarabağ savaşı, “Vətən Müharibəsi” zamanı bütün şəhidlərimiz kimi Afər Mütəllibovun da,
qisası alındı, bu gün onun da, ruhu şaddır. Belə ki, uğrunda öldüyü torpaqlarda artıq Azərbaycan əsgəri dayanır.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Əlmaniz Ələkbərli
Azərbaycan Jurnalistlər Və
Yazıçılar Birliyinin Üzvü.