AZƏRBAYCANDA ƏN GƏNC YAZIÇILARDAN BİRİ OLAN ELTON OSMANOVUN "MƏN KİMƏM" KİTABININ TƏQDİMATI OLUB.
Zaqatala rayon Faldar kənd məktəblisi Elton Osmanov 14 yaşından hekayələr yazmağa başlayıb. On beş yaşına çatana kimi Elton Osmanov "Mən Kiməm" romanını artıq oxucuların istifadəsinə verib.
Azərbaycan Yazıçılar Birliyinin Şimal Qərb Regional Bölməsinin sədri Əlmaniz Ələkbərli gənc yazarın kitab təqdimatını etmək üçün Şəki-Zaqatala regional təhsil idarəsinə müraciət edib. Müraciət müsbət qarşılanıb və 29-09-2023-cü il tarixində Zaqatala rayon Faldar kənd məktəbində gənc yazarın kitabının təqdimatı keçirilib.
Tədbirə Şəki-Zaqatala regional təhsil idarəsinin Zaqatala üzrə sektorunun müdiri Kəmalə Əfəndiyeva və təhsil işçiləri həmkarlar ittifaqı Zaqatala rayon komitəsinin sədri Bəhruz Bayramov, Şəki-Zaqatala regional mədəniyyət idarəsinin Zaqatala rayon Mədəniyyət Mərkəzinin direktoru Aybəniz Heydərova və Mədəniyyət işçiləri həmkarlar ittifaqı Zaqatala rayon komitəsinin sədri Sona Qazıyeva, Şəhid anaları Züleyxa Davudova və Səlminaz Allahyarova, şairlərdən Şixamir Sultanov, Rəşid Mirzəyev, Ömər Dəmirçioğlu, Nüsrət Musayev, Əmrah Yusifov, Güldanə Zərif, Gülniyar Məmmədova, Havva Adəmsoy , Baləkən rayonundan gəlmiş şair Rəşad Balakənli və s. bundan əlavə Faldar kənd tam orta məktəbin direktoru Elçin müəllim başda olmaqla müəllim və şagirdləri iştirak ediblər.
Tədbirə Ümummilli lider və şəhidlərimizin ruhu bir dəqiqəlik sükutla yad edilib. Daha sonra Azərbaycan yazıçılar birliyinin Şimal Qərb Regional Bölməsinin sədri Əlmaniz Ələkbərli çıxış edərək, ədəbi mühitin inkişafı, gənc, yeniyetmə yazarlarla belə görüşlərin keçirilməsini təqdirəlayiq hal olduğunu vurğulayıb:-belə tədbirlər Elton Osmanov yaşda olan digər gənc yazarlar arasında motivasiya, ruh yüksəkliyi yaradacaq. Bu gün bu gənc yazarın kitabının təqdimat mərasiminə başda Şəhid ailələri olmaqla bir neçə idarə müəssisə rəhbərləri və dəyərli şairlərimiz təşrif buyurublar. Düşünürəm ki, Elton Osmanov gələcəkdə dahi yazarlardan biri olacaq və nəinki doğulub boya-başa çatdığı Faldar kəndini, bütövlükdə Zaqatala rayonunu dünyaya tanıdacaqdır.
Daha sonra tədbirdə Zaqatala təhsil sektorunun müdiri Kəmalə Əfəndiyeva çıxış edərək məktəblinin bu uğuruna görə təbrik etdi və ona gələcəkdə daha yaxşı yaradıcılıq uğurları arzuladı.
Sonra Şəhid ailələri həm də şairə Züleyxa Davudova və Səlminaz Allahyarova da çıxış edərək gənc yazar Elton Osmanovu təbrik edib ona yaradıcılıq uğurları arzuladılar. Gülniyar Məmmədova və Güldanə Zərif və Havva Adəmsoy da gənc yazarın başarıqlı yeniyetmə olduğunu xüsusi vurğulayaraq ona gələcəkdə daha qalın romanlar yazmağı arzu etdilər.
Sonra söz şairlərə verildi. Şairlərin şeirləri ard-arda səsləndi. Sonda Azərbaycan Yazıçılar Birliyinin Şimal Qərb Regional Bölməsinin sədri Əlmaniz Ələkbərli gənc yazar Elton Osmanovu Diplomla təltif etdi və ona qol saatı bağışladı. Zaqatala təhsil işçiləri həmkarlar ittifaqının Zaqatala rayon komitəsinin sədri Bəhruz Bayramov qiyməti hədiyyə ilə gənc yazarı daha da həvəsləndirdi. Sonra Mədəniyyət işçiləri həmkarlar ittifaqı Zaqatala rayon komitəsinin sədri Sona Qazıyeva və şəhid anası Səlminaz Allahyarova da gənc yazıçıya qiymətli hədiyyələr təqdim etdilər. Bundan sonra Elton Osmanovun sinif yoldaşları da ona qiyməti hədiyyə təqdim ediblər.
Bundan əlavə Zaqatala yazarlarından olan Havva Adəmsoy, Rəşid Mirzəyev, Əmrah Yusifov və Şixamir Sultanova Azərbaycan Yazıçılar Birliyinin Şimal Qərb Regional Bölməsinin üzvlük vəsiqələri təqdim edilib.
Tədbir məktəb rəhbərliyi tərəfindən təşkil edilən çay süfrəsi ilə yekunlaşıb.
Diaspor.info
Zaqatala bürosu