İsveçin Partill bələdiyyəsində soydaşlarımızın inteqrasiya məsələsi müzakirə edilib
İsveçin Mərkəzi Partiyasından Partill şəhər bələdiyyəsi məclisinə üzv seçilən ilk əcnəbi - soydaşımız Turan Əliyev İsveçdə yeni yaranmış “Buta” Mədəniyyət və İnteqrasiya dərnəyinin üzvləri ilə birlikdə bələdiyyə rəsmiləri ilə görüşüb. Görüşdə Partill bələdiyyəsinin iş prinsipi barədə məlumat verilib, miqrantların, o cümlədən burada yaşayan azərbaycanlıların yerli cəmiyyətə inteqrasiyası və digər məsələlər müzakirə edilib. Turan Əliyev əsas məqsədinin Azərbaycan mədəniyyətini İsveç cəmiyyətində layiqincə təmsil etmək, burada yaşayan soydaşlarımızın qarşılaşdığı çətinliklər zamanı onlara düzgün yol göstərmək və yardım etmək, onların cəmiyyətə inteqrasiyasına maksimum dəstək olmaq, mədəniyyət və inteqrasiya sahəsində yerli və digər dost xalqların dərnək və təşkilatları ilə əməkdaşlıq etmək olduğunu bildirib.
Qeyd edək ki, Turan Əliyev 2018-ci ilin sentyabrında namizədliyi irəli sürülmüş 40 minə yaxın sakini olan Partill şəhər bələdiyyəsinə (Partille Kommunfullmäktige) məclis üzvü seçilib. Turan Əliyev həmin il noyabrın 20-də Partill bələdiyyəsinin iclasında məclis tərəfindən Mədəniyyət komitəsinin əsas üzvü seçilib.