“My Way is The Green Way” (“Mənim yolum Yaşıl Yoldur” ) adlı sərginin açılışı olub
Azərbaycanda 2024-cü ilin “Yaşıl dünya naminə həmrəylik ili” elan edilməsi münasibətilə və ölkəmizdə keçiriləcək COP29 beynəlxalq tədbirinə dəstək məqsədilə “Leyla Xəzəri” İncəsənət Qalereyasında “My Way is The Green Way” (“Mənim yolum Yaşıl Yoldur” ) adlı rəsm sərgisinin açılışı olub.
“My Way” (“Mənim yolum”) Yaradıcılıq Mərkəzinin rəhbəri Alyona Bədəlova, art direktor Emin Quliyev və “Esmiralda” art studiyanın rəhbəri Esmiralda Tağızadənin təşkilatçılığı ilə baş tutan sərgidə ekologiya mövzusunu və Azərbaycanın bənzərsiz təbiətini təsvir edən 50-dən çox eksponat təqdim olunub.
Diasporla İş üzrə Dövlət Komitəsinin şöbə müdiri Səlhət Abbasova bildirib ki, Nyu-Yorkdan olan müəlliflər heç vaxt Azərbaycana gəlməsələr də, ölkəmizin bənzərsiz gözəlliklərini öz əsərlərində əks etdiriblər. S.Abbasova COP29-un bu il Azərbaycanda keçirilməsini ölkəmizin növbəti uğuru kimi qiymətləndirib və sərgiyə müvəffəqiyyətlər diləyib.
“My Way” Yaradıcılıq mərkəzinin direktoru Alyona Bədəlova qeyd edib ki, tanınmış azərbaycanlı rəssam və heykəltəraş Emin Quliyevin “Azərbaycana sevgi ilə” adlı incəsənət layihəsi 10 ildir ki fəaliyyət göstərir. ABŞ-dən olan uşaqlar bu sərgi vasitəsilə Azərbaycanın tarixi və mədəniyyəti ilə yaxından tanış olmaq imkanı qazanırlar.
İncəsənət studiyasının bədii rəhbəri Esmiralda Tağızadə sərgini təşkilinə görə rəsm qalereyasının rəhbərlərinə, bütün iştirakçılara və onların valideynlərinə dərin minnətdarlığını bildirib. Tədbirin sonunda iştirakçılara və müəllimlərə diplomlar təqdim olunub.
