Soydaşlarımız Cenevrədə “Gənc istedadlar” konsertində çıxış edib
İsveçrə Azərbaycanlıları Koordinasiya Şurasının üzvü Mariya Xan-Xoyskaya Martinyolinin rəhbəri olduğu “İRS” rəqs qrupu həmin ölkənin Toloşenaz şəhərində yerləşən “İvuşka” rus mədəniyyət birliyinin 5-ci “Gənc istedadlar” konsertində çıxış edib.
Qrupun Vasif Adıgözəlovun “Bayram Suitası” və Rəşid Behbudovun ifasında "Lalələr" mahnısının müşayiəti ilə oynadığı Azərbaycan rəqsləri tamaşaçıların alqışları ilə qarşılanıb.
İsveçrənin Cenevrə şəhərində yaşayan Mariya Xan-Xoyskaya Martinyoli Azərbaycan ənənəvi rəqsləri ilə peşəkar səviyyədə məşğul olur. Onun yaratdığı və Cenevrədə, həmçinin Fransanın yaxınlığında yaşayan azərbaycanlı uşaqlardan ibarət “İRS” rəqs qrupu Cenevrədə bir çox mədəni tədbirlərdə iştirak edir, auditoriyanın rəğbətini qazanır.
