Diaspor TV-də yeni layihəyə start verilib
Diasporla İş üzrə Dövlət Komitəsinin internet televiziyası olan Diaspor TV-də ölkəmizin maraq və mənafelərinin beynəlxalq arenada güclənməsinə mühüm töhfələr verən Azərbaycan diasporu haqqında rus dilində yeni veriliş efirə çıxacaq. “Güc birlikdədir”(“Сила в единстве”) adlanan veriliş tarixçi alim, jurnalist Teymur Atayevin təqdimatında yayımlanacaq. Verilişdə Azərbaycanın nüfuzunun artması, maraqlarının müdafiəsi üçün beynəlxalq hüquq normaları çərçivəsində yorulmadan, usanmadan çalışan soydaşlarımızın gördüyü işlərin qlobal diaspor platformasında yaratdığı yeni reallıqlardan danışılacaq. Milli və dini mənsubiyyətindən asılı olmayaraq Azərbaycan diaspor hərəkatının bütün nümayəndələrinin koordinasiyalı fəaliyyəti sayəsində “qüdrətli” erməni diasporu mifinin dağıdılmasına birlikdə nəzər salınacaq. Vətəndən uzaqda, qürbətdə yaşayan, qəlbi vətən sevgisi ilə döyünən insanlar Azərbaycan ictimaiyyətinə daha yaxından tanıdılacaq.
Verilişinin ilk buraxılışının qonağı Fransada yaşayan hüquqşünas, Qərbi Azərbaycan İcmasının Fransa və Qərbi Avropa üzrə nümayəndəsi, “Fransada Qərbi Azərbaycan irsinin qorunması” İctimai Birliyinin sədri Zaur Sadıqbəylidir. O, tamaşaçılara həm Fransadakı Azərbaycan diasporunun fəaliyyətindən danışacaq, həm də gənclərin diqqətini öz soykökünü, milli-mənəvi dəyərlərini, ənənələrini unutmadan tarixi vətəndən kənardakı həyata uyğunlaşmağa kömək edəcək ən mühüm nüanslara yönəldəcək, bu barədə şəxsi təcrübəsini bölüşəcək.
Qeyd edək ki, Diaspor TV 2018-ci ildən fəaliyyət göstərir. Diaspor TV-nin efirində tanınmış diaspor nümayəndələri ilə müsahibələr, bir neçə dildə xəbərlər, tanıtım xarakterli videoçarxlar yayımlanır. Diaspor TV-nin İctimai TV ilə ortaq layihəsi olan “Vətən uzaqda deyil” verilişi artıq 6 ildir efirdədir.
