ÜMUMMİLLİ LİDER HEYDƏR ƏLİYEVİN ANADAN OLMASININ 101-Cİ İLDÖNÜMÜ MÜNASİBƏTİLƏ KEÇİRİLƏN İNŞA YAZI MÜSABİQƏSİNİN QALİBLƏRİ MÜKAFATLANDIRILIB.
Məlum olduğu kimi Ümummilli Lider Heydər Əliyevin anadan olmasının 101-ci ildönümü yaxınlaşır, bu münasibətlə respublikanın hər yerində müxtəlif tədbirlər, yarışlar və müsabiqələr keçirilir. Belə müsabiqələrdən biri də “Azərbaycan Yazıçılar Birliyinin Şimal-qərb Regional Bölməsi Və Şəki-Zaqatala Regional Təhsil İdarəsinin ATİAHİ-nin” rayon komitələri ilə birgə təşkil etdiyi “Heydər Əliyev Məktəblilərin Gözü İlə” inşa yazı müsabiqəsidir.
Bir neçə aydır davam edən müsabiqənin qalibləri artıq məlum olduğuna görə təltifolunma mərasimlərinə start verilib. İlk təltifolunma tədbiri 03-05-2024-cü ildə Qəbələ rayonunda, şəhər 5 saylı tam orta məktəbdə keçirilib. 
Tədbirdə “Azərbaycan Yazıçılar Birliyi Şimal-qərb Regional Bölməsinin sədri, yazıçı-jurnalist Əlmaniz Ələkbərli, Şəki-Zaqatala Təhsil Regional Təhsil İdarəsi Qəbələ Rayon Təhsil Sektorunun” müdiri Arifə Bayramova, “Yeni Azərbaycan Partiyasının” Qəbələ rayon təşkilatının sədri Abil Ağasəfov, Qəbələ RİH “İctimai-siyasi və humanitar məsələlər şöbəsinin” müdir müavini Pərviz Ağayev, bir neçə məktəb direktorları, müəllim və qalib olan şagirdlər, Qəbələ rayon ictimaiyyətinin nümayəndələri də iştirak ediblər. 
Tədbiri giriş sözü ilə açan AYB Şimal-qərb regional bölməsinin sədri Əlmaniz Ələkbərli ilk öncə Ulu öndərin və ərazi bütövlüyümüz uğrunda canından keçmiş bütün şəhidlərimizin ruhunu bir dəqiqəlik sükutla yad etməyi təklif edib. Daha sonra natiq tədbirin mahiyyətindən və Ümummilli Lider Heydər Əliyev haqqında şəxsi xatirələrini söyləyib:”..məlum məsələdir, Heydər Əliyev elə bir dahi şəxsiyyətdir ki, onun haqqında bizdən sonra gələcək nəsillər də araşdırmalar aparacaq və bu fitri istedad sahibini dərindən öyrənəcəklər. 
Ancaq bu günün gəncliyi, şagirdlərimizin əlinə daha yaxşı fürsət düşüb ki, Heydər Əliyevlə canlı ünsiyyətdə olan insanların dilindən bunları öyrənə bilsinlər. Mənə bu xoşbəxtlik iki dəfə, tələbə olduğum vaxtlarda Naxçıvan şəhərində nəsib olub. Ümummilli liderimiz yaşının fərqinə baxmayaraq hamını təmkinlə dinləyir və onun sualını da cavablandırırdı. 
Bizim görüşümüz o vaxt baş tutmuşdu ki, Naxçıvanın bütün yolları, o cümlədən hava yolları da, bağlı idi və insanlar çörəklə imtahana çəkilirdi. Həmin dövrdə Heydər Əliyev Naxçıvana tək quru canıyla gəlmişdi, nə sərvətimiz nə də ki, silah-sursatımız var idi. O böyük şəxsiyyət nəinki Naxçıvanı bu vəziyyətdən çıxardı, bununla yanaşı bütöv Azərbaycanı yox olmaqdan qurtardı.
Onun 101-ci ildönümünə həsr olunan inşa yazısı çox əhəmiyyətlidir. Belə ki, şagirdlərimiz onun haqqında daha çox oxuyur və öz fikirlərini kağız üzərinə köçürə bilirlər. Odur ki, belə inşa yazı müsabiqələri nə qədər çox keçirilərsə şagirdlərimiz daha çox Heydər Əliyev irsini dərindən öyrənər.”
Daha sonra tədbirdə Qəbələ şəhər 5 saylı tam orta məktəb kollektivinin Ümummilli Lider Heydər Əliyev haqqında hazırladığı video-çarx nümayiş olunub. Sonra söz Şəki-Zaqatala Regional Təhsil İdarəsi Qəbələ rayon təhsil sektorunun müdiri Arifə Bayramovaya verilib.
Arifə xanım Qəbələ məktəblilərinin bir çox yarışmalarda, olimpiadalarda və bu kimi inşa yazı müsabiqələrində çox aktiv iştirak etdiyini vurğulayıb. Tədbirin təşkilatçılarına xüsusi minnətdarlığını bildirən sektor müdiri inşa yazı müsabiqəsində qalib olan şagirdləri təbrik etdi. Arifə xanım qaliblər arasında xüsusəndə “Zona” qalibləri arasında Qəbələ məktəblisinin olmasını da xüsusi vurğulayaraq şagirdləri ürəkdən təbrik etdi.
Bundan sonra Qəbələ şəhər 5 saylı tam orta məktəbin yuxarı sinif şagirdləri gözəl bir kompozisiya ilə çıxış etdilər. Sonra söz YAP Qəbələ rayon təşkilatının sədri Abil Ağasəfova verildi. Abil müəllim Azərbaycanın Ümummilli Lideri Heydər Əliyevin anadan olmasının 101-ci ildönümü ilə bağlı keçirilən inşa yazı müsabiqəsini alqışladığını bildirdi.
Dahi şəxsiyyət, Ulu Öndər Heydər Əliyev siyasəti və onun Azərbaycan xalqı üçün etdikləri haqqında ətraflı danışan Abil Ağasəfov məktəblilər arasında keçirilən inşa yazı müsabiqəsinin Heydər Əliyev irsinin öyrənilməsində böyük rol oynayacağına inandığnı xüsusi vurğulayaraq qalibləri ürəkdən təbrik edib.
Tədbirdə çıxış edən Qəbələ RİH “İctimai-siyasi və humanitar məsələlər şöbəsinin” müdir müavini Pərviz Ağayev də əvvəlcə rayon rəhbəri adından tədbir iştirakçılarını salamladı. Sonra Heydər Əliyevin anadan olmasının 101-ci ildönümünə həsr olunan “Heydər Əliyev Məktəblilərin Gözü İlə” inşa yazı müsabiqəsinin təşkilatçıları olan “Azərbaycan Yazıçılar Birliyinin Şimal-qərb Regional Bölməsi Və Şəki-Zaqatala Regional Təhsil İdarəsinin ATİAHİ-nin” rayon komitələrinə öz təşəkkürünü bildirib. Pərviz müəllim belə müsabiqələrin məktəblilər arasında keçirilməsini xüsusi alqışlayaraq, bunun gələcək nəsillərin yetişməsində böyük rol oynayacağını qeyd edib. Və çıxışının sonunda qalib olmuş şagirdləri ürəkdən təbrik edib.
Sonra yekun nitq söyləyən AYB Şimal-qərb Regional Bölməsinin sədri Əlmaniz Ələkbərli tədbirin təşkili üçün Qəbələ şəhər 5 saylı tam orta məktəbində yaradılan şəraitə görə zəhməti keçən hər bir kəsə öz minnətdarlığını bildirib. Və bundan sonra qaliblər təltif olunublar, sonda xatirə şəkili çəkilib.
Diaspor.info
Qəbələ.
