Azərbaycan Təhsil İşçiləri Azad Həmkarlar İttifaqı Nizami Rayon Komitəsinin təşkilatçılığı ilə 5 Oktyabr – Beynəlxalq Müəllimlər Günü münasibətilə tədbir keçirilib. Tədbirdə Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ RK) sədrinin müavini Mirzə Cəfərzadə, Azərbaycan Həmkarlar Ittifaqları Konfederasiyası sədrinin müşaviri Orxan Ərəbov, rayonun təhsil müəssisələrinin rəhbərləri, müəllimlər və ictimaiyyət nümayəndələri iştirak ediblər.
Əvvəlcə Dövlət Himni səsləndirilib. Şəhidlərimizin əziz xatirəsi bir dəqiqəlik sükut ilə anılıb.
Nizami Rayon Komitəsinin sədri Sübut Əsədov çıxış edərək Beynəlxalq Müəllimlər Günü münasibətilə təhsil sahəsində çalışanları təbrik edib, onlara şərəfli işlərində uğurlar diləyib. Qeyd olunub ki, Ümummilli Lider Heydər Əliyevin Azərbaycan müəllimlərinə göstərdiyi yüksək diqqət və qayğı bu gün ölkə başçısı İlham Əliyev tərəfindən uğurla davam etdirilir.
Tədbirin sonunda fərqlənən bir qrup təhsil işçisinə Fəxri Fərman və hədiyyələr təqdim olunub.
Rayon təhsil işçiləri göstərilən qayğı və diqqətə görə Azərbaycan Təhsil İşçiləri Azad Həmkarlar İttifaqı Respublika Komitəsinin sədri Araz Paşayevə minnətdarlıqlarını bildiriblər.
