Avstraliya İttifaqının Melburn şəhərində 31 Dekabr – Dünya Azərbaycanlılarının Həmrəyliyi Günü və Yeni il münasibətilə tədbir təşkil edilib.
Tədbir Diasporla İş üzrə Dövlət Komitəsinin və Azərbaycanın Avstraliya İttifaqındakı Səfirliyinin dəstəyi, Avstraliya Azərbaycan Assosiasiyaları Alyansına daxil olan Avstraliya Azərbaycan Cəmiyyəti və Azərbaycan Viktoriya Mədəniyyət Assosiasiyasının birgə təşkilatçılığı ilə baş tutub.
Toplantıya bu ölkədə yaşayan çoxsaylı Azərbaycan icmasının üzvləri, Avstraliya Federal Parlamentinin və Viktoriya ştat parlamentinin deputatları, eləcə də şəhər bələdiyyə şurasının sədri və yerli milli icma rəhbərləri qatılıb.
Əvvəlcə Diasporla İş üzrə Dövlət Komitəsinin sədri Fuad Muradov toplantı iştirakçılarını təbrik edib. Federal səviyyədə yenicə qeydiyyatdan keçmiş bütün icma təşkilatlarını özündə birləşdirən Avstraliya Azərbaycan Assosiasiyaları Alyansının fəaliyyətinə uğurlar arzulayıb.
Azərbaycanın Avstraliya İttifaqındakı Səfirliyinin müvəqqəti işlər vəkili Vaqif Cəfərov tədbir iştirakçılarını bayram münasibətilə təbrik edib, Dünya Azərbaycanlılarının Həmrəyliyi Gününün tarixi, mahiyyəti, bu günün təsis olunmasında Azərbaycan xalqının Ümummilli Lideri Heydər Əliyevin rolu haqqında qonaqlara məlumat verib.
Tədbirdə həmçinin Avstraliya Federal Parlamentinin üzvü konqresmen Keys Vollohan (Keith Vollohan), Viktoriya Parlamentinin üzvü konqresmen Riçard Velç (Richard Velch) və Azərbaycan Avstraliya Assosiasiyaları Alyansının rəhbəri Fuad Aydınbəyzadə çıxış edib. Avstraliyanı özləri üçün ikinci vətən sayan azərbaycanlıların qürbətdə yaşamalarına baxmayaraq, bu ölkənin sosial-iqtisadi, ictimai-siyasi və mədəni həyatında daha fəal rol oynamağa çalışdığını söyləyiblər.
Daha sonra icma üzvlərinin ifasında Azərbaycanın milli rəqsləri və musiqiləri əsasında konsert proqramı təqdim olunub. 
