Qahirə Universitetində Azərbaycan dilinin tədrisi davam edir
Misirin Qahirə Universitetinin Ədəbiyyat fakültəsinin Şərq dilləri bölməsində Azərbaycan dilinin tədrisi bu il də davam etdirilir.
Azərbaycan dilini tələbələrə “Vətənpərvər" - Azərbaycanın Misirdəki Diaspor Təşkilatları Birliyinin və Misir-Azərbaycan Dostluq Cəmiyyətinin sədri, tədqiqatçı-alim Seymur Nəsirov tədris edir.
Dərslərdə gənclərə ölkəmizin zəngin mədəniyyəti, xalqımızın adət-ənənələri, ölkələrimiz arasında müxtəlif sahələrdə əlaqələrin inkişafı və Azərbaycan həqiqətləri ilə bağlı geniş məlumat verilir.
Universitetin 4-cü kursunda tədris olunan Azərbaycan dili dərslərində 100-dən çox tələbə iştirak edir. Dilimizi öyrənməyə böyük maraq göstərən gənclər onu daha yaxşı mənimsəmək üçün dərsdənkənar əlavə kursların təşkili ilə də bağlı müraciət ediblər. Azərbaycanlı alim bunun üçün bütün imkanların olduğunu bildirərək, yaxın günlərdə Qahirədəki diaspor mərkəzində Azərbaycan dilini öyrənmək istəyən yeni tələbələr üçün əlavə kursların təşkil ediləcəyini söyləyib.
Misirin müxtəlif universitetlərində təhsil alan tələbələr Misir-Azərbaycan Dostluq Cəmiyyətinin nəzdində təşkil olunan Azərbaycan dili kurslarında iştirak edirlər. Burada dünyanın 59 ölkəsindən 650-dən çox tələbə Azərbaycan dili də daxil olmaqla, müxtəlif fənlər üzrə ödənişsiz təhsil alır. Onların arasında məqalələrin Azərbaycan dilindən ərəb dilinə tərcümə etmək bacarığı olanlar da var.
Seymur Nəsirovun tədris etdiyi Azərbaycan dili dərsində əcnəbi tələbələrin dilindən Xalq şairi Səməd Vurğunun məşhur “Azərbaycan” şeirindən bir parçanı aşağıdakı linkə daxil olaraq dinləyə bilərsiniz:
https://www.facebook.com/Dr.SeymurNasirov/videos/581100908247699
Qeyd edək ki, diaspor təşkilatlarının və fəallarının gördüyü bu kimi işlər milli-mənəvi dəyərlərimizin, tarixi-mədəni irsimizin tanıdılması baxımından olduqca faydalıdır.
