BALAKƏNDƏ HEYDƏR ƏLİYEV MƏKTƏBLİLƏRİN GÜZÜ İLƏ ADLI İNŞA YAZI MÜSABİQƏSİNİN QALİBLƏRİ TƏLTİF OLUNUBLAR.
Ümummilli lider Heydər Əliyevin anadan olmasının 102-ci ildönümünə sayılı günlər qalır. Bu münasibətlə respublikanın hər yerində silsilə tədbirlər keçirilir. Dövlət qulluqçuları, səhiyyə və mədəniyyət sahələrində də Ulu öndərin doğum günü ilə bağlı silsilə tədbirlər keçirilir.
Elm və Təhsil nazirliyi bu sahədə daha çox tədbirlər keçirir desək, yanılmarıq.
Belə tədbirlərdən biri də, artıq illərdir ənənə halına çevrilən inşa yazı müsabiqələrinin keçirilməsidir. Azərbaycan Yazıçılar Birliyinin Zaqatala bölməsi də artıq üçüncü ildir ki, Ümummilli liderimiz Heydər Əliyevin doğum günüylə bağlı inşa yazı müsabiqəsinin əsas təşkilatçılarındandır. Belə ki, AYB Şimal-qərb bölgəsi, Şəki-Zaqatala regional təhsil idarəsi, YAP Balakən rayon təşkilatı və ATİAHİ-nin Balakən rayon komitəsinin birgə təşkilatçılığı ilə “Heydər Əliyev Məktəblilərin Gözü İlə”adlı inşa yazı müsabiqəsi keçirilib.
Ümumiyyətlə sözügedən inşa yazı müsabiqəsi Qəbələ, Oğuz, Şəki, Qax, Zaqatala və Balakən rayonlarında təhsil alan məktəblilər arasında keçirilib. Artıq qaliblər müəyyənləşdiyi üçün onların təltifolunma mərasimlərinə start verilib. İlk belə tədbir 25 aprel Qax rayon Heydər Əliyev Mərkəzində keçirilib. İkinci tədbir 28-04-2025-ci ildə Qəbələ rayonunda keçirilib. 
Üçüncü belə tədbir 29-04-2025-ci ildə Oğuz şəhər Emin Abdullayev adına 2 nömrəli internat tipli texniki və təbiət fənləri təmayüllü Liseydə keçirilib. Dördüncü tədbir isə 30-04-2025-ci ildə Şəki şəhər “7” nömrəli tam orta məktəbin akt zalında keçirilib. Beşinci tədbir Balakən şəhər Zərifə Əliyeva adına şəhər “3” nömrəli tam orta məktəbin akt zalında keçirilib.Tədbir Dövlət himninin səsləndirilməsi, Ulu öndər Heydər Əliyevin və şəhidlərimizin ruhunu bir dəqiqəlik sükutla yad etməklə başlayıb. Daha sonra çıxış üçün söz inşa yazı müsabiqəsinin əsas təşkilatçılarından biri olan AYB Zaqatala Bölməsinin sədri Əlmaniz Ələkbərliyə verilib. 
Əlmaniz müəllim tədbir iştirakçılarını salamladıqdan sonra üzünü gənclərə və yuxarı sinif şagirdlərinə tutaraq deyib:-inşa yazı müsabiqəsinin keçirilməsində bir məqsədimiz var, Heydər Əliyev irsini daha yaxından öyrənmək: -”Hamıya məlumdur ki, Azərbaycan yenicə müstəqilliyini elan etdikdən sonra səriştəsiz rəhbərlərin səhvi üzündən xalqımız vətəndaş müharibəsi astanasında idi. Bu vaxt xalqımız öz müdrik oğlu Heydər Əliyevə üz tutaraq, xalqı bu bəladan xilas etməsini istədi. 
Ümummilli lider Heydər Əliyev paytaxt Bakı şəhərinə qayıdaraq təkcə xalqımızı bu bəladan xilas etmədi. O elə bir uğurlu siyasətin təməlini qoydu ki, bir müddət sonra Azərbaycan dövləti iqtisadi cəhətdən qafqazın ən güclü dövlətlərindən birinə çevrildi. Siz məktəblilər dahi şəxsiyyət haqqında çox şeyləri bilmir və onun Azərbaycan üçün etdiklərini daha yaxşı dərk edə bilmirsiniz. Bu gün bir çox iri dövlətlər özündən kiçik dövlətlərin torpaqlarını bütün dünyanın gözü qarşısında işğal edir. 
Azərbaycan isə iki əsrlik tarixində heç vaxt edə bilmədiyini məhz Heydər Əliyev siyasətinin gücü ilə edərək tam suverenliyini bərpa edə bildi. Belə ki, Ümummilli lider Heydər Əliyevin siyasi varisi olan, Ali Baş komandan İlham Əliyevin rəhbərliyi ilə cəmi 44 gün davam edən “Vətən Müharibəsi” zamanı xalqımız Qarabağı tamamilə işğaldan azad etdi. Bu təkcə torpaqlarımızın geri qaytarılması ilə yadda qalmadı, dünyanın supergüclərinin hələ heç bir müharibələrdə istifadə etmədiyi bir taktika ilə 21-ci əsrin ən müasir müharibəsinin aparılması ilə də yaddaşlarda qaldı. 
Azərbaycan əsgəri XTQ döyüşçüləri ilə yanaşı, PUA və İtiqovanlarla düşməni torpaqlarımızdan qovub çıxardı. Ulu öndərin uzaqgörən siyasəti nəticəsində əvvəlcə atəşkəs əldə olundu, daha sonra iqtisadi layihələr, müqavilələr sayəsində Azərbaycan iqtisadiyyatı güclənərək dövlətimizi qüdrətli bir dövlətə çevirdi. Bu gün Dünyanın ən aparıcı dövlətləri belə qafqazda hər hansı bir layihəni həyata keçirmək istəyirsə Azərbaycan dövlətinin maraqları ilə mütləq hesablaşırlar. 
İstəyirəm ki, məktəblilərimiz Heydər Əliyevin nə qədər dahi bir şəxsiyyət olduğunu onun gördüyü işlərlə tanış olaraq dərk etsinlər.
“Heydər Əliyev Məktəblilərin Gözü İlə” adlı inşa yazı müsabiqəsinin təşkilində Şəki-Zaqatala regional təhsil idarəsi Balakən rayon təhsil sektorunun müdiri Mehparə Mirzəyeva, ATİAHİ Balakən rayon komitəsinin sədri Ramazan Moulov, YAP Balakən rayon təşkilatının sədri Azad Balayevə təşkilati dəstəyə görə təşəkkür edirəm. 
Daha sonra tədbirdə söz YAP Balakən rayon təşkilatının sədri Azad Balayevə verilib. Azad müəllim də öz çıxışında dahi şəxsiyyət Heydər Əliyev haqqında geniş danışıb, onun xalqımızı və dövlətimizi düçar olduğu çox çətin bir vəziyyətdən işıqlı sabaha çıxarmasını xüsusi vurğulayıb. Azad müəllim YAP-nın yaranmasının tarixi zərurət olduğunu vurğulayaraq bu barədə də ətraflı məlumat verib.
Daha sonra Ulu öndər Heydər Əliyevin misilsiz xidmətlərindən, o cümlədən təhsilimizə, müəllimə verdiyi yüksək qiymətdən ətraflı danışıb. Hələ sovetlər birliyi dövründə Heydər Əliyev Azərbaycana rəhbərliyə gəldikdən sonra respublikamızın inkişafına görə birinciliyə yüksəldiyini deyib. Heydər Əliyev siyasəti sayəsində bu gün Azərbaycanın çox sürətlə inkişaf etdiyini xüsusi vurğulayıb. O bildirib ki, artıq respublikamız öz suverenliyini tam bərpa edib. Biz Azərbaycan Respublikası Prezidenti Cənab İlham Əliyevin apardığı uğurlu siyasət nəticəsində əsrlərlə üzləşdiyimiz böyük problemlərimizdən bir qismini tam həll edə bilmişik.Azad müəllim belə tədbirlərin keçirilməsinin, məktəblilərin Ulu öndər haqqında inşa yazıları yazmasının Heydər Əliyev irsinin öyrənilməsində böyük rol oynaya biləcəyini xüsusi vurğulayıb. Sonda qalibləri təbrik edən Azad müəllim artıq ənənə halını almış inşa yazı müsabiqəsinin əsas təşkilatçılarından olan AYB Zaqatala bölməsinə və onun sədri Əlmaniz Ələkbərliyə öz minnətdarlığını bildirib.
Bundan sonra təltifolunma mərasimində çıxış edən Şəki-Zaqatala regional təhsil idarəsi-Balakən rayon Təhsil sektorunun müdiri Mehparə Mirzəyeva artıq ənənə halını almış inşa yazı müsabiqəsinin keçirilməsinin təqdirəlayiq hal olduğunu vurğulayıb:- Bilirsiniz ki, Ümummilli lider Heydər Əliyevin doğum günü ərəfəsində Elm və Təhsil nazirliyi silsilə tədbirlər keçirir. Ən yaxşı təqdimat, vəyaxud inşa yazı müsabiqələri, bir çox idman yarışları da, məhz məktəblilər arasında keçirilir ki, bu da Ulu öndər Heydər Əliyev irsinin öyrənilməsi və təbliğ olunmasına xidmət edir.
Sevindirici haldır ki, artıq üçüncü ildir AYB Şimal-qərb regional bölməsi bizimlə birgə “Heydər Əliyev Məktəblilərin Gözü İlə” adlı inşa yazı müsabiqəsini keçirir və qalib məktəbliləri yazıçılar seçir. Buna görə AYB Şimal-qərb regional bölməsinin sədri Əlmaniz Ələkbərliyə xüsusilə təşəkkür edirəm.
Məktəblilərin, xüsusilə yuxarı sinif şagirdləri arasında keçirilən inşa yazı müsabiqəsi, uşaqların Heydər Əliyev haqqında daha çox bilgiyə sahib olmalarına səbəb olacaqdır. Müstəqil Azərbaycan dövlətində elə bir sahə yoxdur ki, orada Heydər Əliyevin izi olmasın, odur ki, bu dahi şəxsiyyətin doğum günüylə bağlı keçirilən inşa yazı müsabiqələri müsbət haldır.
Tədbirin sonunda qaliblərin adları elan olunub:-Balakən Şəhər A. Novruzov adına humanitar və texniki fənnlər təmayüllü liseyin 10-cu sinif şagirdi Aylin Abduxaliqova “Heydər Əliyev Məktəblilərin Gözü İlə”adlı inşa yazı müsabiqəsində Balakən məktəbliləri arasında birinci yerə layiq görülüb. İkinci yerə Balakən şəhər N. Gəncəvi adına “1” nömrəli tam orta ümumtəhsil məktəbinin “9”-cu sinif şagirdi Leyla Fərzəliyeva layiq görülüb. Üçüncü yerə isə Balakən şəhər Zərifə Əliyeva adına tam orta ümumtəhsil məktəbinin “11-a” sinif şagirdi Ayşə Xəlilova layiq görülüb.
Dördüncü yer, həvəsləndirici diploma isə Hənifə kənd tam orta ümumtəhsil məktəbinin “10”-cu sinif şagirdi Fidan Kərimova layiq görülüb.
Qaliblərə müxtəlif hədiyyələr təqdim olunub və sonda xatirə şəkili də çəkilib.
Əlmaniz Ələkbərli
Baş Redaktor.
