UNEC ZAQATALA FİLİALINDA “MÜSTƏQİL AZƏRBAYCAN İQTİSADİYYATINDA HEYDƏR ƏLİYEVİN ROLU” ESSE MÜSABİQƏSİNİN QALİBLƏRİ TƏLTİF OLUNUBLAR-FOTOLAR.
Ulu öndər Heydər Əliyevin anadan olmasının 102-ci ildönümünə sayılı günlər qalıb.Bu münasibətlə respublikanın hər yerində silsilə tədbirlər keçirilir. Elm və Təhsil nazirliyi bu sahədə daha çox tədbirlər keçirir desək, yanılmarıq. Belə tədbirlərdən biri də, artıq illərdir ənənə halına çevrilən inşa yazı müsabiqələrinin keçirilməsidir. 
Azərbaycan Yazıçılar Birliyinin Zaqatala bölməsi də artıq üçüncü ildir ki, Ümummilli liderimiz Heydər Əliyevin doğum günüylə bağlı inşa yazı müsabiqəsinin əsas təşkilatçılarındandır. Belə ki, AYB Şimal-qərb bölgəsi, Şəki-Zaqatala regional təhsil idarəsi, YAP-nın rayon təşkilatları, ATİAHİ rayon komitələri və Rayonlardakı Heydər Əliyev mərkəzlərinin birgə təşkilatçılığı ilə “Heydər Əliyev Məktəblilərin Gözü İlə”adlı inşa yazı müsabiqəsi keçirilib. 
Ümumiyyətlə sözügedən inşa yazı müsabiqəsi Qəbələ, Oğuz, Şəki, Qax, Zaqatala və Balakən rayonlarında təhsil alan məktəblilər arasında keçirilib. Qaliblər müəyyənləşdiyi üçün onların təltifolunma mərasimlərinə start verilib. İlk belə tədbir 25 aprel 2025-ci ildə Qax rayon Heydər Əliyev Mərkəzində keçirilib. İkinci tədbir isə 28-04-2025-ci ildə Qəbələ şəhərində 1 nömrəli tam orta məktəbdə keçirilib. 
Üçüncü belə tədbir isə 29-04-2025-ci ildə Oğuz şəhər Emin Abdullayev adına 2 nömrəli internat tipli texniki və təbiət fənləri təmayüllü Liseyində keçirilib. Dördüncü tədbir isə 30-04-2025-ci ildə Şəki şəhər “7” nömrəli tam orta məktəbin akt zalında keçirilib.Beşinci tədbir 01-05-2025-ci ildə, Balakən rayonunda Zərifə Əliyeva adına şəhər 3 nömrəli tam orta məktəbdə keçirilib. Zaqatalalı qaliblərin və Zona qaliblərinin mükafatlandırılması tədbiri isə 02-05-2025-ci ildə Zaqatala rayon Heydər Əliyev mərkəzinin böyük zalında keçirilib. 
Zaqatala Peşə Məktəbinin qalib şagirdlərinin mükafatlandırılması tədbiri isə 06-05-2025-ci ildə Zaqatala Peşə Məktəbinin akt zalında keçirilib.
07-05-2025-ci ildə isə Azərbaycan Yazıçılar Birliyi Şimal-qərb regional bölməsi, Azərbaycan Dövlət İqtisad Universitetinin Zaqatala filialı, YAP Zaqatala rayon təşkilatı və Zaqatala Rayon Heydər Əliyev Mərkəzinin birgə təşkilatçılığı ilə “Müstəqil Azərbaycan İqtisadiyyatında Heydər Əliyevin Rolu” adlı “Esse” müsabiqəsinin qalibləri təltif olunublar. Tədbir UNEC Zaqatala filialının akt zalında, pedaqoji kollektiv, dəvət olunmuş qonaqlar və tələbələrin iştirakı ilə keçirilib. 
Tədbirdə əvvəlcə Dövlət himni səsləndirilib, daha sonra Ümummilli lider Heydər Əliyevin və Şəhidlərimizin ruhu bir dəqiqəlik sükutla yad edilib. Sonra söz Azərbaycan Dövlət İqtisad Universiteti Zaqatala filialının direktoru i.f.d.dos. Raqif Qasımova verilib. Qonaqları salamlayan Raqif müəllim “Esse” müsabiqəsinin keçirilməsini təqdirəlayiq hesab edərək, bu müsabiqənin keçirilməsində məqsəd Heydər Əliyev irsinin daha dərindən öyrənilməsidir, deyib. Təşəbbüsə görə AYB Şimal-qərb regional Bölməsinin sədri Əlmaniz Ələkbərliyə təşəkkürünü bildirib.
Və sonra Ulu öndər Heydər Əliyevin misilsiz xidmətlərindən, o cümlədən təhsilimizə, müəllimə verdiyi yüksək qiymətdən ətraflı danışıb. Hələ sovetlər birliyi dövründə Heydər Əliyev Azərbaycana rəhbərliyə gəldikdən sonra respublikamızın inkişafına görə birinciliyə yüksəldiyini deyib. Heydər Əliyev siyasəti sayəsində bu gün Azərbaycanın çox sürətlə inkişaf etdiyini xüsusi vurğulayıb. O bildirib ki, bu gün zamanla itirilən torpaqlarımız artıq geri qaytarılıb və respublikamız öz suverenliyini tam bərpa edib. Artıq biz Azərbaycan Respublikası Prezidenti Cənab İlham Əliyevin apardığı uğurlu siyasət nəticəsində böyük problemlərimizdən bir qismini tam həll edə bilmişik.
Daha sonra müasir Azərbaycan dövlətinin qurulması və möhkəmlənməsi üçün Ulu öndər Heydər Əliyevin böyük neft kontraktlarına imza atmasından danışıb. Və Ümummilli liderin dövlətimiz və ordumuzun bugünkü inkişafa qədər gəlib çatmasındakı xidmətlərindən ətraflı danışan Raqif müəllim, sonda müsabiqə qaliblərini təbrik edib.
Sonra söz Azərbaycan Yazıçılar Birliyi Şimal-qərb Regional bölməsinin sədri, yazıçı-jurnalist Əlmaniz Ələkbərliyə verilib. Əlmaniz müəllim bu günə kimi keçirilmiş inşa və esse yazı müsabiqələri haqqında tədbir iştirakçılarına ətraflı məlumat verib.
Ə.Ələkbərli belə tədbirlərin keçirilməsinin tələbə və şagirdlərin daha çox maariflənməsində rolu olduğunu deyib:-“Müstəqil Azərbaycan İqtisadiyyatında Heydər Əliyevin Rolu” esse yazı müsabiqəsinin keçirilməsində bir məqsədimiz var, Heydər Əliyev irsini daha yaxından öyrənmək:-”Hamıya məlumdur ki, Azərbaycan yenicə müstəqilliyini elan etdikdən sonra səriştəsiz rəhbərlərin səhvi üzündən xalqımız vətəndaş müharibəsi astanasında idi. Bu vaxt xalqımız öz müdrik oğlu Heydər Əliyevə üz tutaraq, xalqı bu bəladan xilas etməsini istədi. 
Ümummilli lider Heydər Əliyev paytaxt Bakı şəhərinə qayıdaraq təkcə xalqımızı bu bəladan xilas etmədi. O elə bir uğurlu siyasətin təməlini qoydu ki, bir müddət sonra Azərbaycan dövləti iqtisadi cəhətdən qafqazın ən güclü dövlətlərindən birinə çevrildi. Siz tələbələr dahi şəxsiyyət haqqında çox şeyləri, onun dövlətimiz üçün etdiklərini mətbuatdan, kitablardan oxuyaraq öyrənirsiniz. Bizlər, yaşlı nəslin nümayəndələri isə eyni dövrdə yaşadığımız üçün daha yaxşı bilir və həmin hadisələrin şahidi olmuşuq. 
Bu gün dünyada inanılmaz hadisələr baş verir, bir çox iri dövlətlər özündən kiçik dövlətlərin torpaqlarını bütün dünyanın gözü qarşısında işğal edir. Və həmişə olduğu kimi dünya bu ədalətsizliyə susur. Azərbaycan dövləti isə iki əsrlik tarixində heç vaxt edə bilmədiyini məhz Heydər Əliyev siyasətinin gücü ilə təmin edərək tam suverenliyini bərpa edə bildi. Belə ki, Ümummilli lider Heydər Əliyevin siyasi varisi olan, Ali Baş komandan İlham Əliyevin rəhbərliyi ilə cəmi 44 gün davam edən “Vətən Müharibəsi” zamanı xalqımız Qarabağı tamamilə işğaldan azad etdi. 
Bu təkcə torpaqlarımızın geri qaytarılması ilə yadda qalmadı, dünyanın supergüclərinin hələ heç bir müharibələrdə istifadə etmədiyi bir taktika ilə 21-ci əsrin ən müasir müharibəsinin aparılması ilə də yaddaşlarda qaldı. Azərbaycan əsgəri XTQ döyüşçüləri ilə yanaşı, PUA və İtiqovanlarla düşməni torpaqlarımızdan qovub çıxardı.
Bütün bunlara məhz Heydər Əliyev siyasətinin gücü ilə nail olmaq olardı. Belə ki, Ulu öndərin uzaqgörən siyasəti nəticəsində əvvəlcə atəşkəs əldə olundu, daha sonra iqtisadi layihələr, iri neft müqavilələri sayəsində Azərbaycan iqtisadiyyatı güclənərək dövlətimizi qüdrətli bir dövlətə çevirdi. 
Bu gün Dünyanın ən aparıcı dövlətləri belə qafqazda hər hansı bir layihəni həyata keçirmək istəyirsə Azərbaycan dövlətinin maraqları ilə mütləq hesablaşırlar. İstəyirəm ki, tələbələrimiz Heydər Əliyevin nə qədər dahi bir şəxsiyyət olduğunu onun gördüyü işlərlə yaxından tanış olaraq dərk etsinlər.
“Müstəqil Azərbaycan İqtisadiyyatında Heydər Əliyevin Rolu” adlı esse yazı müsabiqəsinin təşkilində göstərdiyi dəstəyə görə Azərbaycan Dövlət İqtisad Universiteti Zaqatala filialının direktoru i.f.d.dos. Raqif Qasımova öz təşəkkürümü bildirirəm.
Daha sonra söz “Qərbi Azərbaycan İcması” Zaqatala rayon üzrə nümayəndəsinin müavini Mirzə Hüseynova verilib. Mirzə müəllim Qərbi Azərbaycana qayıdışla bağlı tələbələrin marağına səbəb olacaq geniş məruzə ilə çıxış edib. Və öz çıxışında dahi şəxsiyyət Heydər Əliyev haqqında geniş danışaraq, onun xalqımızı və dövlətimizi düçar olduğu çox çətin bir vəziyyətdən işıqlı sabaha çıxarmasını xüsusi vurğulayıb.
Mirzə müəllim uzun illərin pedaqoqu kimi yanaşma edərək, belə tədbirlərin keçirilməsinin, tələbələrin Ulu öndər haqqında esse yazıları yazmasının Heydər Əliyev irsinin öyrənilməsində böyük rol oynaya biləcəyini vurğulayıb.
Bundan sonra söz “Esse” yazı müsabiqəsinin iştirakçısı Ayda Arzumanovaya verilib. A. Arzumanova yazdığı esseni monitorda göstərməklə, izahlı şəkildə tədbir iştirakçılarına təqdim edib.
Tədbirdə YAP Zaqatala rayon təşkilatının sədr müavini Qudbiddin Qardaşov, AYB Şimal-qərb regional bölməsinin fəalları da iştirak ediblər.
Tədbirin sonunda qalibləri təltif etmək üçün səhnəyə AYB Şimal-qərb Regional bölməsinin sədri Əlmaniz Ələkbərli dəvət olunub.
Əlmaniz müəllim “Müstəqil Azərbaycan İqtisadiyyatında Heydər Əliyevin Rolu” Esse müsabiqəsinin qaliblərini səhnəyə dəvət edib.
Birinci yerə Fərda Yusifov, ikinci yerə Cavidan Həzizadə, üçüncü yerə Ayda Arzumanova, dördüncü və həvəsləndirici mükafata isə Elşən Canməmmədov layiq görülüb. Qaliblərə müxtəlif diplom, sertifikat və hədiyyələr təqdim olunub.
Sonda xatirə şəkli çəkilib.
[center]
Əlmaniz Ələkbərli
Diaspor.info saytının
Baş Redaktoru.
